ԵՐԵՎԱՆ, 2 սեպտեմբերի — Sputnik. Ճապոնիայում հզոր Թայֆուն է սպասվում, որի ազդեցությունը կզգան նաև Ռուսաստանի արևելյան շրջանների բնակիչները։
Այս մասին իր ֆեյսբուքի էջում հայտնել է ՀՀ ԱԻՆ Հիդրոմետ ծառայության օդերևութաբանության կենտրոնի պետ Գագիկ Սուրենյանը։
Նա իր գրառման մեջ հայտնում է, որ սեպտեմբերի 4-ին Ճապոնիայի ափերին է մոտենալու Ջեբի անվանմամբ արևադարձային թայֆունը, որն իր հզորությամբ դասվում է ամենավերջին`5-րդ կարգին:
«Փոթորկի տրամագիծը հասնում է 1000 կմ-ի, օդի ճնշումը կենտրոնում նվազել է մինչև 929 մբ, քամու առավելագույն արագությունը 220-240կմ/ժ է»,– հայտնում է Սուրենյանը:
Նա նաև նշում է, որ փոթորիկը հարվածելու է ոչ միայն Ճապոնիայի ամբողջ տարածքին, այլև Ռուսաստանի արևելյան շրջաններին, հասնելով մինչև Սախալին:
Գագիկ Սուրենյանը հրապարակել է նաև թայֆունի տեղաշարժն ու զարգացումը պատկերող տիեզերքից արված տեսագրությունը։
