ԵՐԵՎԱՆ, 18 հոկտեմբերի — Sputnik. Հայաստանի կառավարությունը Մարդու իրավունքների եվրոպական դատարանի վճռով 3000 եվրո կվճարի Գրիգոր Ոսկերչյանին։ ՄԻԵԴ–ը հրապարակել է Գրիգոր Ոսկերչյանի գործով վճիռը։
Վերջինս մեղադրվում էր 2008 թվականի մարտին զանգվածային անկարգությունների հրահրման և պետական իշխանության բռնատիրության փորձի մեջ։
Գրիգոր Ոսկերչյանը կալանավորվել է մարտի 8-ին և տարվել է ոստիկանություն, որտեղ հարցաքննվել է ցույցերի ժամանակ բաժանած թռուցիկների շուրջ։ Մարտի 11-ին նրան մեղադրանք է առաջադրվել։ 2009-ին նրան դատապարտել են 2 տարվա ազատազրկման։ Սակայն հետագայում Ոսկերչյանը համաներման շնորհիվ ազատ է արձակվել։
ՄԻԵԴ–ը վճռել է, որ այս դեպքի քննության շրջանակներում տեղի է ունեցել Մարդու իրավունքների եվրոպական կոնվենցիայի 5-րդ հոդվածի 3-րդ մասի խախտում։ Անընդունելի է համարվել նաև կալանքի տակ պահելու համապատասխան ու բավարար հիմնավորում տրամադրելուց դատարանի մերժումը։
ՄԻԵԴ–ը պարտավորեցրել է Հայաստանին 3000 եվրո վճարել որպես փոխհատուցում։