ԵՐԵՎԱՆ, 18 նոյեմբերի — Sputnik. Ադրբեջանի Արտաքին գործերի նախարարությունը բողոք կներկայացնի ԱՄՆ-ին՝ Արցախի նախագահ Բակո Սահակյանին մուտքի արտոնագիր տրամադրելու հետ կապված: Այս մասին հաղորդում է Sputnik Ադրբեջանը` հղում անելով երկրի ԱԳՆ մամուլի ծառայությանը:
«Անօրինական ռեժիմի ներկայացուցչի ելույթը ԱՄՆ տարածքում և անջատողական կառույցների խրախուսումը հակասում է Միացյալ Նահանգների պարտավորություններին՝ որպես ԵԱՀԿ Մինսկի խմբի համանախագահի: Այդ քայլը վնաս է հասցնում հակամարտության բանակցային ճանապարհով կարգավորմանը», - ասված է Ադրբեջանի ԱԳՆ հայտարարության մեջ:
Հայտարարության մեջ հատուկ ընդգծել է, որ «անջատողական ռեժիմի ներկայացուցիչներին ամերիկյան մուտքի արտոնագիր տրամադրելը կարող է լուրջ խնդիրներ առաջացնել ԱՄՆ վիզային ընթացակարգերի համար»:
Հիշեցնենք, որ նախօրեին Ադրբեջանի արտաքին գործերի նախարարությունը նմանատիպ բողոքի նոտա էր հղել Փարիզին՝ Արցախի Հանրապետության նախագահ Բակո Սահակյանի Ֆրանսիա այցի պատճառով։
