ԵՐԵՎԱՆ, 28 հունվարի - Sptunik. Հայկական ծագում ունեցող աշխարհահռչակ կոմպոզիտոր ու դաշնակահար Միշել Լեգրանի հրաժեշտի արարողությունը տեղի կունենա Փարիզում Սուրբ Ալեքսանդր Նևսկու տաճարում։ Այս մասին, հղում անելով տաճարի ներկայացուցչին, հայտնում է ՌԻԱ Նովոստին։
Միշել Լեգրանը մահացել է հունվարի 26–ին՝ 86 տարեկանում։
«Լեգրանի հրաժեշտի արարողությունը կկայանա ուրբաթ ժամը 11.30–ին։ Մեզ շատ մարդիկ են զանգում, հետաքրքրվում են` կարելի է արդյոք գալ հրաժեշտ տալ, արդեն հարյուրավոր զանգեր են եղել», – ասել է եկեղեցու ծառայողը։
Նրա խոսքով` ընտանիքը դեռ ոչինչ չի ասել արարողության ձևաչափի վերաբերյալ։ Սակայն եկեղեցու ծառայողը ենթադրել է, որ մուտքը կարգավորելու է սգո ծառայությունը։
«Կարծում եմ` առաջին հերթին կլինեն ընտանիքն ու մտերիմները, իսկ նկարահանումներն ու հարցազրույցներն արդեն երևի տաճարի տարածքից դուրս», – հավելել է աղբյուրը։
Նշենք, որ մի քանի տարի առաջ Լեգրանն այդ տաճարում ամուսնացել է իր կնոջ` ռուսական ծագում ունեցող ֆրանսիական դերասանուհի Մաշա Մերիլի հետ, որը Գագարինների իշխանական տոհմից է։
Փարիզում գտնվող ուղղափառ Սուրբ Ալեքսանդր Նևսկու տաճարը կառուցվել է դեռ XIX դարում ռուսաստանցիների նվիրաբերությունների հաշվին։ Տարբեր ժամանակներում այստեղ հրաժեշտ են տվել Տուրգենևին, Շալյապինին, Բունինին ու Օկուջավային։
Լեգրանը ծնվել է 1932 թվականի փետրվարի 24-ին Փարիզում։ Լեգրանի հայրը` Ռայմոն Լեգրանը, կոմպոզիտոր էր, դիրիժոր ու նվագախմբի ղեկավար։ Մայրը` Մարսել Տեր-Միքայելյանը, դաշնակահարուհի էր, ազնվական հայկական ընտանիքից։
Լեգրանը 10 տարի ապրել է մորական պապի` Սարգիս Տեր-Միքայելյանի հետ, որը կյանքից հեռացել է 1942 թվականին։ 1915 թվականին Սարգիս Տեր-Միքայելյանը Ֆրանսիա է փախել Օսմանյան կայսրությունում իրագործվող Հայոց ցեղասպանության պատճառով։
Լեգրանն առաջին անգամ Հայաստան է եկել 2004 թվականին` Շառլ Ազնավուրի հետ համատեղ համերգի։
Մաեստրոն երկրորդ անգամ Հայաստան եկավ 2009 թվականին` Սերգեյ Սմբատյանի ղեկավարած Հայաստանի պետական երիտասարդական նվագախմբի հրավերով։ Նրան Հայաստանի «Պատվո շքանշանով» են պարգևատրել։ Լեգրանը պատմական հայրենիք է եկել նաև 2012 և 2017 թվականներին։
Լեգրանը գրել է մոտ 800 ստեղծագործություն 250 ֆիլմի համար։ Ավելի քան 100 ձայնասկավառակ է ձայնագրել։
«Նվագելիս դու տասը մատ ունես, իսկ երևակայության մեջ` անվերջություն». մի անգամ ասել է նա:
Մաեստրոն երեք անգամ «Օսկար» է ստացել, հինգ անգամ` «Գրեմմի», մեկ անգամ` BAFTA, մեկ անգամ` «Ոսկե գլոբուս»։ Նա Ֆրանսիայի Պատվո Լեգեոնի շքանշանի ասպետ է։
