ԵՐԵՎԱՆ, 12 մարտի — Sputnik. Ռուսական գազը Վրաստանի տարածքով Հայաստան հասցնելու պայմաններին վերաբերող բանակցություններն ավարտվել են։ Ըստ Sputnik Գրուզիայի` այսօր հրավիրված ասուլիսի ժամանակ այս մասին հայտնել է Վրաստանի վարչապետ Մամուկա Բախտաձեն։
Վրաստանի կառավարության և «Գազպրոմ–էքսպորտի» միջև 2017 թվականի հունվարին երկու տարի ժամկետով ստորագրած պայմանագրի համաձայն` առաջին տարում տարանցման համար վճարումը որոշ չափով իրականացվում էր հումքով, բայց հետագայում, միջազգային չափորոշիչների համաձայն, կողմերն անցան գումարային հաշվարկի։ Ավելի վաղ Վրաստանն իր տարածքով գազը Հայաստան տեղափոխելու համար «Գազպրոմից» ստանում էր գազի 10%–ը (200 մլն խմ)։
«Գազպրոմն» ու պաշտոնական Թբիլիսին գազի տարանցման նոր պայմանագրի շուրջ բանակցություններ էին վարում մի քանի տարի։ Վրաստանը մինչև վերջին պահը ձգձգում էր դրամայնացման անցնելու հարցը, իսկ պայմանագրի ժամկետն ավարտվել է 2018 թվականի դեկտեմբերի 31-ին։
«Բանակցությունները փաստացի ավարտվել են։ Ուզում եմ հիշեցնել, թե բանակցությունների ընթացքում ինչ սկզբունքներով էր առաջնորդվում էկոնոմիկայի նախարարությունը. առաջինը` անկասկած մեր էներգետիկ անկախությունն է, երկրորդ սկզբունքը` այդ պայմանագրում մեր դիրքերը բարելավելը... Բանակցություններն ավարտվել են` ամբողջությամբ հաշվի առնելով այս սկզբունքները», – ասել է Բախտաձեն։
Նրա խոսքով` մանրամասները հայտնի կդառնան կառավարության նիստի ավարտից հետո, երբ էկոնոմիկայի նախարարությունը հայտարարություն անի։
Վրաստանը ռուսական գազ չի գնում 2017 թվականից։ Վրաստանին բնական գազով է ապահովում Ադրբեջանը, բայց չի կարողանում լրացնել Վրաստանում բնական գազի պակասուրդը, քանի դեռ չի գործարկել «Շահ–Դենիզ-2» նախագիծը։ Ադրբեջանն ինքը կապույտ վառելիքի հետ կապված խնդիրներ ունի։
2018 թվականին Վրաստանի տարածքով Հայաստան է հասել 1,93 մլրդ խմ գազ։ 2017 թվականին գազի տարանցման ծավալը մոտ 2 մլրդ խմ է կազմել։
Ռուսաստանի և Հայաստանի միջև կնքված պայմանագրի համաձայն` նախատեսվում է տարեկան մինչև 2,5 մլրդ խմ գազ ներմուծել մեր երկիր։
