ԵՐԵՎԱՆ, 31 մարտի — Sputnik. Քվեարկել եմ Ուկրաինայի համար։ Այս մասին լրագրողների հետ զրույցում ասաց նախագահական ընտրություններում իր քվեարկությունը կատարած Ուկրաինայի գործող նախագահ Պյոտր Պորոշենկոն։
Այս մասին տեղեկացնում է ՌԻԱ Նովոստին։
«Այսօր ես, ինչպես իմ ամբողջ ընտանիքը և ուկրաինացիների մեծամասնությունը, քվեարկել ենք հանուն Ուկրաինայի»,-ասել է Պորոշենկոն։ Նրա դիտարկմամբ`ընտրությունները լավ են կազմակերպված:
Երբ լրագրողները հետաքրքրվել են՝ ինչ սպասումներ ունի ղեկավարն ընտրություններից, նա պատասխանել է.«Ակնկալում եմ Ուկրաինայի և իմ հաղթանակը»:
Հիշեցնենք, որ ավելի վաղ ընտրատեղամաս էր եկել ու ընտրություններում քվեարկել էր նախագահական ընտրապայքարի առաջատար համարվող շոումեն, երգիծաբան Վլադիմիր Զելենսկին:
Ուկրաինայում մարտի 31-ին մեկնարկել են նախագահական ընտրությունները:
Դրանց մասնակցում են ռեկորդային քանակով թեկնածուներ՝ 39 մարդ, այդ թվում՝ գործող նախագահ Պյոտր Պորոշենկոն:
