ԵՐԵՎԱՆ, 2 ապրիլի – Sputnik. Սթիվ Ջոբսի հիմնած Apple ընկերությունը հրաժարվել է իր իսկ ապրանքից` AirPower անլար լիցքավորման սարքից, որը պատրաստվում էր թողարկել առաջիկայում։ Այս մասին հայտնում է TechCrunch-ը։
Աքսեսուարի չեղարկումը կանխորոշված չէր, քանի որ վերջերս թողարկված AirPods 2 ականջակալների տուփի վրա կար այդ սարքի ակնհայտ հղումը։ Իսկ սարքից հրաժարվելու պատճառը մի շարք ինժեներական խնդիրներն են։
Սարքն առաջիններից էր, որ ներկայացվեց Սթիվ Ջոբսի մահից հետո Կալիֆոռնիայում բացված թատրոնում։ Այն ցուցադրվեց iPhone X-ի ցուցադրության ժամանակ դեռևս 2017 թվականի սեպտեմբերին։ Համարվում էր, որ AirPower–ը կդառնա ընկերության առաջատար սարքը։
Հիշեցնենք, որ սա ընկերության առաջին ձախողված նախագիծը չէ։ Ձախողումների շարքն են դասվում iPhone-ի BendGate ճկվող համակարգը և iPhone 4-ի AntennaGate–ը, իսկ MacBook-ների համար նախատեսված ստեղնաշար–թիթեռը մինչև հիմա էլ գլխացավանք է Apple-ի համար։
