ԵՐԵՎԱՆ, 3 ապրիլի — Sputnik. Ղազախստանի սենատի պատգամավոր, ֆինանսների և բյուջեի կոմիտեի անդամ Դաուրեն Ադիլբեկովը դժգոհել է, որ երկրում աշխատավարձներն ավելի ցածր են, քան Հայաստանում, որտեղ նավթ ու գազ չկա։ Այս մասին գրում է Tengrinews–ը։
Նա դիմել է Ղազախստանի ֆինանսների նախարարության հարկային և մաքսային օրենսդրության դեպարտամենտի տնօրենին և նշել, որ երկրում նվազագույն աշխատավարձը 42 500 տենգե է (115 դոլար)։
«Հիմա լսեք`Ուկրաինայում 149 դոլար է, Հայաստանում` 152 դոլար, Բելառուսում` 154 դոլար, Ռուսաստանում` 172 դոլար... Որտե՞ղ են մեր եկամուտները։ Ի՞նչ ենք անելու եկամուտների հետ։ Հուսով եմ`համաձայն չեք, որ մեզ մոտ 115 դոլար է, իսկ Հայաստանում` 152։ Այնտեղ նավթ ու գազ չկա, Մենդելեևի աղյուսակ չկա։ Իսկ ինչո՞ւ մենք չենք կարող», – ասել է Ադիլբեկովը 2019-2021 թվականի հանրապետական բյուջեում նախատեսված փոփոխությունների քննարկման ժամանակ։
Սենատորի կարծիքով` Ֆինանսների նախարարությունում չեն մտածում`ինչպես ավելացնել երկրի բյուջեն, բացի այն միջոցներից, որոնք ստացվում են նավթի վաճառքի և ազգային հիմնադրամի տրանսֆերտների հաշվին։
«Դուք չեք տեսնում և չեք մտածում` ինչպես ավելացնել եկամուտները։ Դա լավ վերաբերմունք չէ։ Մեկ տրիլիոնով ավելացնում ենք... բյուջեի ծախսային մասը, դրանից միայն 180 միլիարդը ձեր մասն է, մնացածը` ազգային հիմնադրամինը, որը այլ նպատակների համար է նախատեսված։ Կարծում եմ, որ խնդիրներ կան։ Ֆինանսների նախարարությունը, Ազգային տնտեսության նախարարությունը պետք է ելք գտնեն և առաջարկեն` ինչպես ենք ապահովելու տնտեսության աճը, ընդլայնելու հարկվող բազան», – ասել է Ադիլբեկովը։
Սենատորը նախարարության ներկայացուցչին խնդրել է կոնկրետ առաջարկներ ներկայացնել։
Նշենք, որ Հայաստանում նվազագույն աշխատավարձը (հարկերի պահումից հետո) 55 հազար դրամ է (շուրջ 115 դոլար)։