20:56 26 ապրիլի 2019
Ուղիղ եթեր
  • USD481.33
  • GBP621.06
  • EUR536.06
  • RUB7.43
Լիբանանում Սաուդյան Արաբիայի դեսպան Ուալիտ Պուխարի այցը Մեծի Տանն Կիլիկիո կաթողիկոսարան (9 ապրիլի 2019): Անթիլիաս, Լիբանան

«Ազնուական, առատաձեռն ու խիզախ հայ ժողովուրդը կրցաւ իր Դատը կենդանի պահել». դեսպան Պուխարի

© Photo: Ազդակ օրաթերթ
Աշխարհ
Ստանալ կարճ հղումը
Sputnik Արմենիան` արևմտահայերենով (116)
21410

Սէուտական Արաբիոյ Դեսպան Ուալիտ Պուխարի Այցելեց Անթիլիասի Կաթողիկոսարան։

ԵՐԵՒԱՆ, 9 ապրիլի-Sputnik. Լիբանանի մէջ Սէուտական Արաբիոյ դեսպան Ուալիտ Պուխարի այսօր` 9 ապրիլին, աննախընթաց եւ յատկանշական քայլով մը այցելեց Մեծի Տանն Կիլիկիոյ կաթողիկոսարան, ուր հանդիպում ունեցաւ Արամ Ա. վեհափառ հայրապետին հետ եւ Հայոց ցեղասպանութեան մատուռին մէջ իր յարգանքի տուրքը մատուցեց մէկուկէս միլիոն սուրբ նահատակներու յիշատակին։ Ներկայ գտնուեցան նաեւ ՀՅԴ Լիբանանի Կեդրոնական կոմիտէի ներկայացուցիչ երեսփոխան Յակոբ Բագրատունի եւ Պուրճ Համուտի քաղաքապետ Մարտիկ Պօղոսեան։ Այս մասին կը յայտնէ «Ազդակ»-ը:

Վեհափառ հայրապետը ողջունեց հիւրը ու անոր` Մեծի Տանն Կիլիկիոյ կաթողիկոսութիւն այցելութիւնը եւ անդրադարձաւ այն իրողութեան, որ հայ ժողովուրդը 7-րդ դարէն ի վեր միշտ անմիջական եւ դրացիական յարաբերութեան մէջ եղած է իսլամութեան եւ իսլամներուն հետ՝ թէ՛արաբական աշխարհին մէջ, եւ թէ՛ հետագային Օսմանեան կայսրութեան մէջ։

Արամ Ա. կաթողիկոս անդրադարձաւ հայ ժողովուրդին եւ Հայց. եկեղեցւոյ երկարատեւ ու դրական յարաբերութեան` իսլամութեան եւ արաբ ժողովուրդին հետ։

Վեհափառը յիշեցուց, որ Մեծի Տանն Կիլիկիոյ կաթողիկոսութիւնը միշտ գործակցութեան եւ երկխօսութեան մէջ եղած է արաբ եւ իսլամ ժողովուրդին հետ` թէ՛ միջազգային մակարդակի վրայ, եւ թէ՛ տարածաշրջանին մէջ, ի մասնաւորի` իսլամ-քրիստոնեայ երկխօսութեան բնագաւառին մէջ։

Ապա խօսք առաւ Սէուտական Արաբիոյ դեսպան Ուալիտ Պուխարին եւ հաստատեց, որ լիբանանահայութիւնը այս երկրի հիմնասիւներէն է, եւ որ` պատմութիւնը չի կրնար մոռնալ անոր դերն ու առաքելութիւնը` իբրեւ հոմանիշ ազգային միասնականութեան եւ համակեցութեան։

«Ազնուական, առատաձեռն ու խիզախ հայ ժողովուրդը կրցաւ իր Դատը կենդանի պահել իրաւունքի, կեանքի, արդարութեան եւ բիւրեղութեան նկատմամբ սէր ունեցող բոլոր ժողովուրդներուն մէջ։ Հայ ժողովուրդը ենթարկուեցաւ մեծ անարդարութիւններու, հալածանքներու, սակայն երբեք չյուսահատեցաւ, չնահանջեց, այլ զայն կարելի է տեսնել  ստեղծագործական եւ արդիւնաբերական բարձրագոյն մակարդակներու վրայ` ամբողջ աշխարհի տարածքին», ըսաւ դեսպանը։ Անոր համաձայն, երկնային կրօնները երբեք չեն ճանչնար անարդարութիւնը։

«Այսօր ես հոս կը գտնուիմ արտայայտելու ձեզի նկատմամբ  մեր ունեցած մեծ գնահատանքը եւ ձեզմով` մեր հպարտութիւնը, ինչպէս նաեւ ձեզի հետ բարեկամական, իրարու բացուելու եւ մէկզմէկու հանդիպելու աւելի մեծ առիթներու ակնկալութեամբ` արդարութեան, իրաւունքի, հաւասարակշռութեան եւ չափաւորականութեան հիման վրայ», եզրափակեց դեսպանը։

թեմա:
Sputnik Արմենիան` արևմտահայերենով (116)

Ըստ թեմայի

Ծանր է, երբ Կուռիարանի նման բարեկամ մը կը հեռանայ… կրկնակի ծանր, որ կը հեռանայ աննկատ
Երբ հարսը «պատանդ կը մնայ», մինչեւ փեսան գումարը ճարէ․ պարտքով երջանկանալու նուրբ արուեստը
Երեւանը անապատ կը դառնա՞յ, թէ՞ քաղաքապետարանը կը պայքարի օլիկարխներու կառուցածին դէմ

Գլխավոր թեմաներ