ԵՐԵՎԱՆ, 19 ապրիլի – Sputnik, Աշոտ Սաֆարյան. ԱՄՆ–ն «Իսլամական հեղափոխության պահապանների կորպուսն» (ԻՀՊԿ) ահաբեկչական կազմակերպություն է ճանաչել՝ Թեհրանի նկատմամբ սեփական ագրեսիվ և հաճախ անբացատրելի գործողությունները հիմնավորելու նպատակով: Այս մասին Sputnik Արմենիայի թղթակցի հետ զրույցում ասաց ԵՊՀ իրանագիտության ամբիոնի վարիչ Վարդան Ոսկանյանը։
Նրա խոսքով՝ ամերիկացիների համար, այդ թվում՝ քարոզչական հարթության վրա, ավելի հեշտ է պայքարել «ահաբեկչական կազմակերպության», քան օրինական, լեգիտիմ կառույցի դեմ:
Ապրիլի 8-ին ԱՄՆ-ն «Իսլամական հեղափոխության պահապանների կորպուսը» (ԻՀՊԿ) ներառեց օտարերկրյա ահաբեկչական կազմակերպությունների ցանկում։ Դրան ի պատասխան, Իրանը ահաբեկչական կառույց ճանաչեց Մերձավոր Արևելքում ԱՄՆ ԶՈւ կենտրոնական հրամանատարությունը:
«Թեպետ ԻՀՊԿ–ն նոր կառույց է, որը ստեղծվել է Իսլամական հեղափոխությունից հետո, այնուամենայնիվ շատ խորը արմատներ ունի: ԻՀՊԿ–ն Իրանի բազմադարյա պետականության խորության և ժառանգականության խորհրդանիշն է: Մենք գիտենք, որ նման կառույց է գոյություն ունեցել Աքեմենյան Պարսկաստանում և կոչվել է «Անմահների գունդ», ևս մեկ նման կառույց՝ «Մատյան գունդը», որի մասին հիշատակվում է նաև հայ պատմիչների աշխատություններում, գոյություն է ունեցել Սասանյանների ժամանակաշրջանում», – ասաց Ոսկանյանը։
Փորձագետը ուշադրություն հրավիրեց ևս մեկ ոչ պակաս կարևոր հանգամանքի վրա. այսօր Իրանում ամենահայտնի ռազմական գործիչը ԻՀՊԿ ստորաբաժանումներից մեկի հրամանատար Ղասեմ Սոլեյմանին է: Նա գրեթե առասպելական կերպար է դարձել, և ԻՀՊԿ-ին ահաբեկչական խմբավորումների ցանկում ներառելը նպատակ ունի վարկաբեկել Իրանում և տարածաշրջանում մեծ հեղինակություն վայելող մարդկանց:
ԱՄՆ-ն այս փուլում փորձում է խեղդել Իրանը՝ պատժամիջոցների միջոցով, և ԻՀՊԿ–ի հետ կապված պատմությունը լիովին տեղավորվում է այդ համատեքստում։ Ամերիկացիները Իրանի հետ անմիջական ռազմական հակամարտության մեջ չեն մտնի, քանի որ Վաշինգտոնում բավականին ադեկվատ մարդիկ են նստած, կարծում է Ոսկանյանը: Իսկ Իրանի դեմ պատերազմը բառացիորեն կփլուզի տարածաշրջանը:
«ԻՀՊԿ-ն ահաբեկչական կազմակերպություն հայտարարելը Իրանի նկատմամբ նոր պատժամիջոցների առիթ է տալիս: Ցանկացած պետություն կամ կազմակերպություն, որը Իրանի հետ առևտրատնտեսական և այլ հարաբերություններ ընթացքում գործ ունենա ԻՀՊԿ–ի հետ, կհայտնվի ամերիկացիների պատժամիջոցների թիրախում, որպես ահաբեկչության աջակից»,- ասաց Ոսկանյանը։
Փորձագետը նշեց, որ ԻՀՊԿ-ն չափազանց կարևոր դեր է խաղում Իրանի տնտեսության մեջ, և օրինակ, հրթիռաշինության ոլորտը, ըստ էության, ենթարկվում է ԻՀՊԿ-ին։
Ոսկանյանի կարծիքով՝ Իրանի դեպքում ԱՄՆ-ի հետապնդած հիմնական նպատակը տնտեսական դժվարությունների արդյունքում սոցիալական ըմբոստության նախադրյալներ ստեղծելն է և իշխանության տապալումը: Սակայն, ամերիկյան պատժամիջոցների բոլոր բացասական հետևանքներով հանդերձ, իրանցիները բավականին լավ են ապրում, կարծում է փորձագետը:
Ըստ նրա` Իրանի շարքային բնակիչն այսօր սնունդ հայթայթելու, հագուստի կամ կացարանի հետ կապված խնդիրներ չունի: Կան, իհարկե, ծայրահեղ աղքատներ և չափազանց հարուստներ, սակայն ակնհայտորեն չի կարելի իրավիճակն աղետալի անվանել: Արևելագետը նկատեց, որ Իրանը վաղուց է սովորել ապրել պատժամիջոցների պայմաններում: Այն շատ հարցերում ինքնաբավ երկիր է, և ցանկացած նոր սահմանափակող միջոց նրանց համար սեփական արտադրությունը զարգացնելու խթան է դառնում:
