Անակնկալ երկրպագուներին. «Գահերի խաղի» պատմությունը չի ավարտվել

ԵՐԵՎԱՆ, 21 մայիսի - Sputnik. 2011թ-ից «Գահերի խաղը» սերիալը աշխարհասփյուռ երկրպագուներն անհամբերությամբ հետևում էին հեռուստաէկրաններին ծավալվող իրադարձություններին․ ի վերջո, ո՞վ է բազմելու «Երկաթե գահին»։ Մայիսի 19-ին HBO-ն ցուցադրեց էպոպեա-սերիալի վերջին՝ 8-րդ եթերաշրջանի եզրափակիչ 6-րդ սերիան, որն ԱՄՆ-ում հեռուստաէկրանների մոտ հավաքեց 19,3 միլիոն մարդու՝ սահմանելով հերթական ռեկորդն ու դառնալով ֆենթեզի ժանրի հեռուստասերիալների պատմության ամենաշատ դիտված սերիան։ Այս մասին հայտնում է Vokrug.tv կայքը։

Մինչ այդ, ամենադիտված ռեկորդակիր սերիան 5-րդն էր՝ 18,4 միլիոն մարդ։ Առհասարակ, 8-րդ եթերաշրջանը մեկը մյուսի հետևից նոր ռեկորդ էր սահմանում՝ առաջին սերիան դիտել էր 17,4 միլիոն մարդ, երրորդը՝ 17,8 միլիոն մարդ․ նշված սերիաներից յուրաքանչյուրը ցուցադրման պահին ռեկորդակիր էր համարվում։

Իսկ Մոսկվայում վերջին եթերաշրջանի եզրափակիչ սերիան դիտելու համար «ՌԴԴ Արենա» ֆուտբոլային մարզադաշտում քառահարկ շենքի բարձրությամբ հսկայական էկրան էր կառուցվել։ 2017թ–ի վերանորոգումից հետո մարզադաշտը 27 հազար հանդիսատես է տեղավորում։

Ի դեպ, «Գահերի խաղի» երկրպագուների համար դեռ վաղ է հրաժեշտ տալ այս ֆանտաստիկ պատմությանը. HBO հեռուստաալիքը վավերագրական ֆիլմ է պատրաստում ՝ «Գահերի խաղը․ վերջին դիրքապահը»։ Ֆիլմում երկրպագուները կտեսնեն նկարահանումների, դրանց նախապատրաստման և հետարտադրության բոլոր մանրամասները, ինչպիսի դժվարին եղանակային պայմաններում են աշխատել դերասաններն ու ամբողջ ստեղծագործական թիմը։

Ավելի վաղ «Սառցի և կրակի երգը» (որի հիման վրա նկարահանվել է սերիալը) վիպաշարի հեղինակ Ջորջ Մարտինն էլ ակնարկել էր, որ հեռուստասերիալի երկրպագուներին նոր անակնկալ է սպասում, քանի որ նրա նոր գրքերը, ըստ հեղինակի, կարող են նյութ դառնալ ամենաքիչը երեք նոր հեռուստանախագծի համար։ Ըստ լուրերի` արդեն այս տարի կմեկնարկեն նոր նախագծի՝ «Երկար գիշերվա» նկարահանումները, որի ռեժիսորն է լինելու Ջորջ Քլարքսոնը («Բժիշկ Հաուս», «Դեքսթեր» հեռուստասերիալների ռեժիսոր)։ Այն կցուցադրվի 2020թ․-ին․ «Երկար գիշերն», այսպես ասած, նախապատմություն է, որը կներկայացնի, թե ինչ է տեղի ունեցել «Գահերի խաղից» 8-10 հազար տարի առաջ։ Երկրպագուները կիմանան Վեսթերոսի պատմությունը, «սպիտակ քայլորդների» ծագումնաբանությունը, հերոսների «ոսկե դարի», Սթարքերի և Թարգարիանների տոհմական լեգենդների մասին և այլն։ Գլխավոր դերակատարներից մեկը լինելու է Նաոմի Ուոթսը։

Հիշեցնենք, որ ավելի վաղ «Գահերի խաղը» հեռուստասերիալի երկրպագուները, դժգոհ լինելով 8-րդ եթերաշրջանից, ստորագրահավաք էին նախաձեռնել՝ վերջին եթերաշրջանը նորից նկարահանելու համար։ BBC-ի հաղորդմամբ՝ ստորագրահավաքին արդեն միլիոնից ավելի մարդ է միացել։