ԵՐԵՎԱՆ, 31 մայիսի — Sputnik. Ամստերդամի քաղաքապետն այցելել է հիվանդանոց`Մել Դալուզյանին տեսակցության։
Այս մասին Facbook-ի իր էջում գրել է մարզիկի ընկերը` Արթուր Մինասյանը։
Նա տեղեկացրել է, որ Ամստերդամի քաղաքապետարանի պատվիրակությունը, քաղաքապետ Ֆեմկ Հալսեմի գլխավորությամբ, քիչ առաջ ժամանեց հոսպիտալ՝ երախտագիտություն հայտնելու Մելին։
«Ձեր արարքը հերոսական է։ Հպարտ եմ, որ Ամստերդամը ձեր պես բնակիչ ունի։ Քաղաքացիական բարձր գիտակցությունն օրինականության և համերաշխ, անվտանգ ու բոլորի համար հարմարավետ միջավայրի գրավականն է։ Երախտապարտ եմ զինված դիմակավորների հակաիրավական գործողություններն արդյունավետ կերպով կասեցնելու համար։ Շուտափույթ ապաքինում եմ մաղթում և վստահեցնում եմ, որ քաղաքապետարանը պատրաստ է անհրաժեշտ ամեն ինչով աջակցել ձեզ»,- ասել է Ամստերդամի քաղաքապետը։
Մինասյանը նաև տեղեկացրել է, որ Մելի վիճակը կայուն է, իսկ միջադեպի առնչությամբ հարուցվել է քրեական գործ, իրավապահները քննում են միջադեպը։
Հիշեցնենք, որ դանակով զինված երկու դիմակավորված անձ Ամստերդամի կենտրոնում փորձել են թալանել Albert Heijn սուպերմարկետի դրամարկղը՝ սպառնալով աշխատողին։ Հայ ծանրամարտիկ Մելինե Դալուզյանը, որն այդ պահին գնումներ էր կատարում, տեսնելով տեղի ունեցողը, աշխատողին օգնության է հասել, տապալել գողերին։ Նրանցից մեկին հաջողվել էր դանակահարել Մելին։ Ոստիկանությունը ժամանել է դեպքի վայր և ձերբակալել նրանց։
