ԵՐԵՎԱՆ, 19 հունիսի — Sputnik. Լիտվայի խորհրդարանականներն առաջարկել են փակել Sputnik Լիտվա տեղեկատվական գործակալության կայք մուտք գործելու հնարավորությունը։ Այս մասին հայտնում է ՌԻԱ Նովոստին` հղում անելով լիտվական խորհրդարանի մամուլի ծառայությանը։
Նշվում է, որ այդ նախաձեռնության հեղինակները «Հայրենիքի միություն` Լիտվայի քրիստոնյա դեմոկրատներ» կուսակցության պատգամավոր Լաուրինաս Կասչյունասը և Աուդրոնյուս Աժուբալիսն են։
Մասնավորապես, պատգամավորները դիմել են Լրագրողների էթիկայի տեսչության ծառայություն, Կապի հսկողության ծառայություն և Հեռուստառադիոհեռարձակման հանձնաժողով` կոչ անելով սուսումնասիրել Sputnik խմբի բոլոր կայքերը և միջոցներ ձեռնարկել` հանրապետության տարածքում Sputnik Լիտվա կայքն արգելափակելու համար։
Նրանց կարծիքով` գործակալության հրապարակած նյութերը «խեղաթյուրում են» Լիտվայի քաղաքականության իրականությունը, այդ թվում այսպես կոչված լիտվացի պարտիզանների պատմությունը։
Աժուբալիսի խոսքով` քաղաքացիների տեղեկատվական անվտանգությունն ապահովելու գործում Լիտվայի ջանքերն «ապարդյուն կլինեն, եթե մենք շարունակենք խուսափել համացանցում ԶԼՄ–ների ոլորտում սկզբունքային գործողություններից»։
«Ռոսիա սեգոդնյա» ՄՏԳ–ի և RT հեռուստաալիքի գլխավոր խմբագիր Մարգարիտա Սիմոնյանը մեկնաբանել է լիտվացի պատգամավորների այդ նախաձեռնությունը։
«Նույնիսկ չգիտեմ, թե Ռուսաստանում ինչպես արձագանենք սրան։ Դե հո չենք կարող լիտվական կայքերն արգելել», – նշել է նա։
Հիշեցնենք, որ մայիսին Վիլնյուսի օդանավակայանում ձերբակալվել էր Sputnik Լիտվայի գլխավոր խմբագիր Մարատ Կասեմը, որը գործուղման էր մեկնել։ Կասեմը ձերբակալվել էր «սպառնալիք ազգային անվտանգությանը» ձևակերպմամբ։ Ավելի ուշ նրան ազատ էին արձակել, բայց Կասեմի անունն ընդգրկել էիին Լիտվայի անցանկալի անձանց ցուցակում։
Ռուսաստանի արտաքին գործերի նախարարությունը հայտարարել է, որ լիտվական իշխանությունները անհեթեթ պատրվակ են ներկայացրել լրագրողի ձերբակալության համար և պահանջել դադարեցնել ռուսական ԶԼՄ–ների ներկայացուցիչների նկատմամբ կոպիտ սադրանքները։
