ԵՐԵՎԱՆ, 12 հուլիսի - Sputnik. Նյու Յորքի ոստիկանությունը ձերբակալել է հայտնի կոմպոզիտոր ու ռեփեր Ռոբերտ Սիլվեստեր Քելլիին, որը ելույթ է ունենում Ար Քելլիի (R Kelly) կեղծանունով։ Այս մասին հայտնում է The Abc News–ը։
Իրավապահները իննսունականների ամենահաջողակ երգիչներից մեկին կասկածում են մանկական պոռնոգրաֆիա նկարահանելու և անչափահասներին պղծելու մեջ։ Քննության վարկածով` նրա զոհերը մի քանիսն են եղել։
Ար Քելլին վաղուց է անչափահասների նկատմամբ ոտնձգությունների մասին դատավարությունների «հերոս» դարձել։ Որոշ մեղադրանքները 1998 թվականին են վերաբերում։ Քելլին չի ընդունում մեղադրանքները։
2008 թվականին երգչին արդեն մեղադրել էին մանկական պոռնոգրաֆիա նկարահանելու ու պահելու, անչափահաս աղջիկների հետ սեռական կապ ունենալու մեջ, սակայն Չիկագոյի դատարանը նրան անմեղ էր ճանաչել։
Ար Քելլին 90–ականների ամենահայտնի հիթերից մեկի` I Believe I Can Fly երգի հեղինակն է։
