ԵՐԵՎԱՆ, 9 օգոստոսի — Sputnik. Աշխատանքային այցով Ղրղըզստանի Հանրապետությունում գտնվող Հայաստանի վարչապետ Նիկոլ Փաշինյանը հանդիպում է ունեցել Ղրղըզստանի նախագահ Սոորոնբայ Ժեենբեկովի հետ։
Ղրղըզստանի նախագահը ողջունել է Հայաստանի վարչապետին Իսիկ Կուլի շրջանի Չոլպոն-Ատա քաղաքում և նշել, որ Փաշինյանը շատ պատվավոր հյուր է իրենց մոտ։
«Ցանկանում եմ նշել, որ ոչ միայն ես, այլև բոլոր ղրղըզստանցիներն են ճանաչում Ձեզ, ծանոթ են Ձեր քաղաքական գործունեությանը։ Ձեր անձնական մասնակցությունը Եվրասիական միջկառավարական խորհրդի այսօրվա նիստին կնպաստի եվրասիական տարածքում համագործակցության զարգացմանը»,–ասել է Սոորոնբայ Ժեենբեկովը:
Շնորհակալություն հայտնելով Ղրղըզստանի նախագահին ջերմ ընդունելության համար՝ ՀՀ վարչապետը նշել է, որ սա իր առաջին այցն է Ղրղըզստան։
Նիկոլ Փաշինյանը մեկնում է Ղրղըզստան
«Մենք քննարկելու շատ հարցեր ունենք, որոնք վերաբերում են և՛ եվրասիական տարածքում մեր հարաբերություններին, և՛ երկկողմ հարաբերություններին։ Ես ծանոթացա այս տարվա վիճակագրությանը. մեր առևտրաշրջանառության ոլորտում նկատվում է աճ։ Իհարկե, մասնաբաժինը դեռ շատ քիչ է, բայց կարծում եմ, որ պետք է աշխատել ողջ ներուժի իրացման ուղղությամբ, որպեսզի առևտրաշրջանառությունն աճի՝ ի շահ մեր երկրների զարգացման։ Կարծում եմ՝ այն հնարավորությունը, որ տրամադրում է Եվրասիական տնտեսական միությունը, կարելի է փաթեթավորել, լիարժեք օգտագործել։ Իհարկե, մենք, եթե կարելի է այդպես ասել, ԵԱՏՄ փոքր երկրներ ենք և շատ ընդհանուր շահեր ունենք։ Դա, իհարկե, չի նշանակում, որ մյուս գործընկերների հետ ինչ-որ խնդիրներ ունենք, ուղղակի մենք ավելի հեշտ ենք հասկանում միմյանց խնդիրները և կարող ենք զարգացնել այն կառուցողական համագործակցությունը, որ կա Հայաստանի և Ղրղըզստանի միջև»,–ասել է Փաշինյանը։
Հայաստանի վարչապետը և Ղրղըզստանի նախագահը քննարկել են քաղաքական երկխոսության ամրապնդմանը, երկկողմ առևտրատնտեսական գործակցության խորացմանը, առևտրաշրջանառության ծավալի ավելացմանը վերաբերող հարցեր։ Անդրադարձ է եղել նաև այս տարի հոկտեմբերին Երևանում կայանալիք Եվրասիական Բարձրագույն տնտեսական խորհրդի նիստի վերաբերյալ հարցերին։
Հայաստանի վարչապետը և Ղրղըզստանի նախագահը մտքեր են փոխանակել հետաքրքրություն ներկայացնող նաև այլ հարցերի շուրջ։ Այս համատեքստում Սոորոնբայ Ժեենբեկովը խոսել է Ղրղըզստանի ներքաղաքական զարգացումների մասին։
Հիշեցնենք, որ ՀՀ վարչապետ Նիկոլ Փաշինյանն աշխատանքային այցով գտնվում է Ղրղըզստանի Հանրապետությունում՝ Եվրասիական միջկառավարական խորհրդի նիստին մասնակցելու նպատակով։
