ԵՐԵՎԱՆ, 9 հունվարի — Sputnik. Իրանն Ուկրաինային և ԱՄՆ–ին նախնական զեկույց է ներկայացրել Թեհրանում «Ուկրաինայի միջազգային ավիաուղիների» Boeing 737 ինքնաթիռի կործանման մասին։ Նախնական տվյալների համաձայն` ավիաաղետից առաջ ինքնաթիռում հրդեհ է բռնկել։
«Նախնական զեկույցը տրամադրվել է Ուկրաինային, որտեղ գրանցված է ինքնաթիռը, ԱՄՆ–ին` որպես արտադրող երկրի, ինչպես նաև Կանադային և Շվեդիային, որոնց քաղաքացիները եղել են ինքնաթիռում», – նշված է Իրանի քաղաքացիական ավիացիայի կազմակերպության հաղորդագրությունում։
Ըստ հաշվետվության` ականատեսների ցուցմունքները վկայում են, որ օդում հրդեհ է եղել, պայթյունը տեղի է ունեցել արդեն ընկնելուց հետո։ Սակայն օդաչուները որևէ տեղեկություն չեն հայտնել արտակարգ իրավիճակ առաջանալու մասին։
Զեկույցի համաձայն` ինքնաթիռի կործանման հետագիծը ցույց է տալիս, որ այն ի սկզբանե շարժվել է օդանավակայանից դեպի արևմուտք։
Վթարված ինքնաթիռը տեխնիկապես սարքին էր. ուկրաինական ավիաընկերության նախագահ
«Երբ տեխնիկական անսարքություն է առաջացել, ինքնաթիռն աջ է շարժվել, գետնին է բախվել արդեն օդանավակայան վերադառնալու ճանապարհին», – նշված է զեկույցում։
Հիշեցնենք` հունվարի 7-ի գիշերը ուկրաինական ընկերությանը պատկանող Boeing 737-800–ը կործանվել էր թռիչքից գրեթե անմիջապես հետո Թեհրանի օդանավակայանից քիչ հեռու։ Զոհվել են օդանավում գտնվող բոլոր ուղևորներն ու անձնակազմի անդամները, ընդհանուր` 176 մարդ։
