ԵՐԵՎԱՆ, 23 փետրվարի –Sputnik. Չինաստանի Հուբեյ գավառում COVID-19 կորոնավիրուսի նոր տեսակից մահացածների թիվը փետրվարի 23-ի դրությամբ հասել է 2346 մարդու, վարակվածներինը` 64000 է։
Մեկ օրվա ընթացքում վարակի 630 նոր դեպք է գրանցվել, վիրուսից 96 մարդ է մահացել։ Բուժվածների ընդհանուր թիվը մոտ 15300 է կազմում։
Հիշեցնենք`2019 թվականին դեկտեմբերին Չինաստանի իշխանությունը հայտարարեց Ուհան քաղաքում անհայտ ծագման վարակի տարածման մասին։
Պարզվեց` հիվանդության հարուցիչը նոր տեսակի կորոնավիրուսն է։
Ենթադրվում է, որ վարակը մարդկանց է փոխանցվել վայրի կենդանիներից։ Գիտականորեն ապացուցվել է, որ փոխանցման հիմնական գործոն են դարձել թեթև նախուտեստները, մասնավորապես՝ ծովամթերքից և օձից պատրաստված։
Բժիշկների խումբ է գործուղվել Մեղրիի բժշկասանիտարական կետ. Իրանի հետ սահմանը հսկվում է
Մահաբեր վիրուսն արդեն դուրս է եկել Չինաստանի սահմաններից ու անգամ Հայաստանին սահմանակից Իրան հասել։ Փետրվարի 19–ին Իրանի իշխանությունը հաստատեց երկրում կորոնավիրուսի վարակի երկու դեպքի մասին տեղեկությունը։ Այսօրվա դրությամբ արդեն Իրանում կորոնավիրուսը 5 մարդու կյանք է խլել։ ՀՀ առողջապահության նախարարությունը փետրվարի 20–ին հայտարարել էր, որ ուժեղացվել են Իրանի հետ սահմանի Մեղրիի սահմանային անցակետով անցնող, ինչպես նաև Իրանից օդանավով Հայաստան ժամանող ուղևորների հսկողությունը: Կասկածելի բոլոր դեպքերում կատարվում է նաև հսկողություն Հայաստանի ամբողջ տարածքում:
ՀՀ–ում մինչ օրս կորոնավիրուսով վարակի դեպք չի գրանցվել:
Բժիշկների խոսքով ՝ կորոնավիրուսին բնորոշ են այնպիսի ախտանշաններ, ինչպիսիք են մրսածությունը, հազը, կոկորդի ցավը և կրծքավանդակում սեղմման զգացումը: Ռիսկի գոտում են թույլ իմունային համակարգ ունեցող մարդիկ, երեխաներն ու տարեցները։