ԵՐԵՎԱՆ, 22 հունիսի – Sputnik. Աշխարհում կորոնավիրուսով վարակվելու հաստատված դեպքերի ընդհանուր թիվը հատել է 9 միլիոնի սահմանը։ Տեղեկությունը հայտնում է Worldometer կայքը։
Հունիսի 22-ի տվյալներով աշխարհում արդեն 9 051 398 մարդ է վարակվել COVID-19–ով, վարակի զոհ դարձածների թիվը հասել է 470 795–ի։
Կորոնավիրուսի տարածման տեմպերով առաջին տեղում է շարունակում մնալ ԱՄՆ-ն, որտեղ կորոնավիրուս է ախտորոշվել 2 356 657 մարդու մոտ, մահացել է 122 247 մարդ: Երկրորդ տեղում Բրազիլիան է. այդ երկրում 1 086 990 մարդ է վարակվել COVID-19–ով, կորոնավիրուսի զոհ դարձածների թիվը հասել է 50 659 –ի: Երրորդ տեղում Ռուսաստանն է՝ 584 680 հաստատված դեպքով, մահացել է 8 111 մարդ։
Առաջին տասնյակում են նաև Հնդկաստանը, Մեծ Բրիտանիան, Իսպանիան, Պերուն, Չիլին, Իտալիան, Իրանը:
Հայաստանն այդ ցուցակի 49-րդ հորիզոնականում է։
Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ: Կազմակերպությունը բոլոր պետություններին կոչ է արել միավորվել վարակի դեմ պայքարում։
Եթե ես չանեմ, չեմ կարող ուրիշից ակնկալել․ կորոնավիրուսի դեմ պայքարող կամավորի պատմությունը