ԵՐԵՎԱՆ, 24 հունիսի –Sputnik. Նոր տիպի կորոնավիրուս տարած մարդկանց ամբողջ կյանքում կարող են ծանր հետևանքներ ուղեկցել, գրում է The Daily Telegraph բրիտանական թերթը` հղում անելով Մեծ Բրիտանիայի առողջապահության ազգային ծառայության մասնագետներին։
Ինչպես պարզել են գիտնականները, կորոնավիրուսից բուժվելուց հետո յուրաքանչյուր երրորդ պացիենտ հետագայում ամբողջ կյանքում կարող է թոքերի հետ կապված խնդիրներ ունենալ, տառապել խրոնիկ հոգնածությունից և հոգեբանական խանգարումներ ունենալ։
Բացի այդ, կորոնավիրուսի ժամանակ ուղեղը վնասելու ռիսկեր կան, ինչը կարող է Ալցհեյմեր հիվանդության զարգացում խթանել։
COVID-19–ից վերականգնվելու բրիտանական կենտրոնի ղեկավար, բժիշկ Հիլարի Ֆլոյդին ապշեցրել է միջին տարիքի մարդկանց թիվը, որոնց մոտ կորոնավիրուսից հետո երկար ժամանակ անաշխատունակություն և խրոնիկ հոգնածություն է նկատվում։ Մասնագետը հավելել է, որ նման հետևանքներ են նկատվում նույնիսկ ուղեկցող հիվանդություններ չունեցող պացիենտների մոտ։
Գիտնականները զգուշացրել են` ապաքինվելուց հետո կորոնավիրուսի հակամարմիններն անհետանում են
Մեծ Բրիտանիայի առողջապահության ազգային ծառայությունում ենթադրել են, որ կորոնավիրուս տարած մարդկանց 30%–ի մոտ ապագայում կարող է թոքերի ֆիբրոզ զարգանալ, 70%–ը կարող են զառանցանքային խանգարում ունենալ։
Բժիշկները նաև նշում են, որ հիվանդանոցից դուրս գրված յուրաքանչյուր տասներորդ բրիտանացու մոտ կորոնավիրուսից հետ սրտի հետ կապված խնդիրներ են նկատվում։
Պրոֆեսոր Փիթեր Օփենշոուն ընդգծել է, որ ինտենսիվ թերապիա անցած պացիենտներից շուրջ մեկ տարի կպահանջվի լիարժեք կյանքին վերադառնալու համար։ Միևնույն ժամանակ նա կարծում է, որ կորոնավիրուս տարած մարդկանց մի մասն այդպես էլ լիարժեք չի վերականգնվի։
