ԵՐԵՎԱՆ, 15 հուլիսի – Sputnik. Հայկական ծագումով իտալացի քիքբռնցքամարտիկ Ջորջիո Պետրոսյանը մարտարվեստի աշխարհում ամենայուրահատուկ մականուններից մեկն ունի։ Հիմա նա 33 տարեկան է, և ավելի քանի 16 տարի է, ինչ նրան «Բժիշկ» են անվանում։ Վիետնամական Webthetao պարբերականին տված հարցազրույցում մարզիկը պատմել է, թե ինչու են իրեն սկսել այդպես անվանել դեռևս պատանի ժամանակ։
«Սկզբում ես «Վիրաբույժ» էի։ 2004-ին ռինգում ինձ այդպես անվանեց դատավորը, երբ մարտի նկարահանումը դիտելով, եկավ այն եզրակացության, որ ֆրանսիացի բռնցքամարտիկի գլխին հասցրած իմ բոլոր չորս հարվածները գործնականում նույնն էին․դրանք խոցել էին հակառակորդի գլխի միևնույն հատվածը և կատարվել էին միանման տեխնիկայով»,-պատմել է Պետրոսյանը։
Շուտով նրան սկսեցին «Վիրաբույժ» կոչել նաև մյուս մարզիկները, հետո սահուն անցան «Բժիշկի»։ Ջորջիոն պրոֆեսիոնալ ռինգ է դուրս եկել 2010թ․-ին՝ արդեն կրելով «Բժիշկ» մականունը։ Քիքբռնցքամարտի աստղը մինչ օրս հայտնի է ռինգում իր ճշգրիտ հարվածներով։
«Ճշգրտությունը շատ կարևոր է, քանի որ ռինգը իմպրովիզի տեղ չէ։ Երբ գալիս է հակառակորդի գրոհի պահը, պետք է լինել պատրաստ, արագաշարժ ու ճշգրիտ, ոչ թե խփել, ինչպես ստացվի։ Հենց այդ դեպքում առավելություն կունենաք»,-պարբերականին պատմել է մարզիկը։
Իբրև իսկական «բժիշկ», Ջորջիան ժամանակակից տեխնոլոգիաներին համընթաց է քայլում և երբեք չի դադարում սովորել։ Նա վիետնամական ամսագրին պատմել է, որ մշտապես փոխում է խաղաոճը, որպեսզի շփոթեցնի հակառակորդներին։
«Ես ուսումնասիրել եմ մուայ թայ տեխնիկաների մեծ մասը և միավորել եմ դրանք քիքբռնցքամարտի հետ։ Իմ երկրպագուներին, երևում է, դա շատ է դուր գալիս։ Ես միշտ աշխատում եմ իմ վրա և ամեն օր հաղթահարում եմ իմ թուլությունները»,-եզրափակել է Պետրոսյանը։
Վիետննամական պարբերականը գրում է, որ Ջորջիո Պետրոսյանը նոր սերնդի լավագույն քիքբռնցքամարտիկ է համարվում և իր հարվածների «բժշկական հավաքածուն» միշտ կատարյալ վիճակում է պահում։
Պետրոսյան. ուզում եմ, որ Հայաստանն ինձ երկրպագի
Պետրոսյանի հետ հարցազրույցը տեղի է ունեցել ծագումով Ալժիրից ֆրանսիացի Սեմի Սանի հետ հանդիպմանն ընդառաջ, որը տեղի կունենա հոկտեմբերի 13-ին՝ Տոկիոյում։
«Չեմ սիրում մարտից առաջ շատ խոսել։ Այդ պատճառով ուղղակի ասում եմ քեզ, Սեմի Սանա`արի հանդիպենք Տոկիոյում»»,-ասել է Ջորջիոն։
Ջորջիո Պետրոսյանը 33 տարեկան է, նա քիքբռնցքամարտի բազմաթիվ մրցաշարերի հաղթող է։ Ծնվել է Երևանում, մանկուց ընտանիքի հետ ապրում է Իտալիայի Միլան քաղաքում։
