ԵՐԵՎԱՆ, 8 օգոստոսի - Sputnik․ Թուրքիայի փոխնախագահ Ֆուաթ Օքթայը Լիբանան կատարած այցի ընթացքում երկրի իշխանությանն առաջարկել է Բեյրութի պայթյունի հետևանքների վերացման ընթացքում օգտվել Միջերկրական ծովում գտնվող թուրքական Մերսին նավահանգստից։ Տեղեկությունը հայտնում է ՌԻԱ Նովոստին` հղում անելով NTV–ին։
«Մենք մեր առաջարկները փոխանցել ենք լիբանանյան կողմին։ Մասնավորապես պատրաստ ենք Լիբանանին տրամադրել Մերսին նավահանգիստը մինչև իրենց սեփական նավահանգիստը վերականգնվի։ Երբ ապրանքները հասնեն Մերսին, դրանք կարելի է փոքր նավերով հասցնել Լիբանան», - ասել է Օքթայը։
Բացի այդ, փոխնախագահի խոսքով, Թուրքիան պատրաստ է Լիբանանին պարենային ու բժշկական օգնություն ցուցաբերել, ինչպես նաև աջակցել Բեյրութի նավահանգստի շինությունների ու ենթակառուցվածքների վերականգնման հարցում։
Հիշեցնենք` օգոստոսի 4-ին Բեյրութի նավահանգստի շրջանում հզոր պայթյուն էր որոտացել։ Վերջին տվյալներով՝ պայթյունի հետևանքով 154 մարդ է մահացել, տուժածների թիվը հասել է 5 հազարի: Նախնական տեղեկություններով` պայթյունի պատճառը նավահանգստի պահեստներում պահվող 2750 տոննա ամոնիումի սելիտրան է եղել։
Աղետալի պայթյունի զոհ է դարձել 13 հայ։
