ԵՐԵՎԱՆ, 27 հոկտեմբերի – Sputnik. Մոսկվայի քաղաքային դումայի հասարակական միավորումների և կրոնական կազմակերպությունների հարցերի հանձնաժողովն ու հայ համայնքի ներկայացուցիչները պատրաստվում են հայերին օգնելու վերաբերյալ պայմանավորվածություն ձեռք բերել։ ՌԻԱ Նովոստիի փոխանցմամբ` այդ մասին հայտնել է հանձնաժողովի ղեկավար Նիկոլայ Զուբրիլինը։
Այսօր հանձնաժողովի նիստի ժամանակ պատգամավորները քննարկել են նաև Լեռնային Ղարաբաղում տիրող իրավիճակը։
«Հանձնաժողովի նիստից հետո կապի մեջ կլինենք հայ համայնքի մեր գործընկերների, այդ թվում` ուսանողական միության հետ։ Նրանք մեզ որոշակի միջոցներ կառաջարկեն բարեկամությունն ու փոխգործակցությունն ամրապնդելու համար, կպատմեն, թե ինչ խնդիրներ ունեն, ինչի կարիք ունեն, ինչ օգնության կարիք ունեն Մոսկվայի քաղաքային դումայից կամ գուցե նույնիսկ Մոսկվայի կառավարությունից, մենք կարող ենք դրանք գրավոր ներկայացնել, երբ ամփոփենք բոլոր առաջարկները», – ասել է Զուբրիլինը։
Նրա խոսքով` ստացված նյութերի հիման վրա հաջորդ նիստի ընթացքում համապատասխան փաստաթուղթ կպատրաստվի, և կսկսվի դրա փուլային իրականացումը։
Հիշեցնենք` սեպտեմբերի 27-ի վաղ առավոտյան Ադրբեջանը, Թուրքիայի աջակցությամբ, լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 27-ի ժամը 13։00-ի դրությամբ` հակառակորդի կրակոցների հետևանքով Արցախում զոհվել են 1009 զինծառայողներ և 39 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6674 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 24 ինքնաթիռ, 16 ուղղաթիռ, 220 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 600 տանկ և ՀՄՄ:
Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին
Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։
Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին
