ԵՐԵՎԱՆ, 29 հոկտեմբերի – Sputnik. Ֆրանսիական ոստիկանությունը Դեսին-Շարպյե (Լիոն քաղաք) կոմունայում կանխել է հայկական և թուրքական համայնքների ներկայացուցիչների միջև բախումները։ Տեղեկությունը հայտնում է ՌԻԱ Նովոստին՝ հղում անելով BFMTV հեռուստաալիքին:
Նշվում է, որ հոկտեմբերի 28-ի երեկոյան թուրքական համայնքի ներկայացուցիչների մոտ 100 ավտոմեքենայով մեկնել են կոմունա, որտեղ մեծաթիվ հայեր կան։ Հեռուստաալիքի տվյալներով ՝ կոմունա են մեկնել նաև շուրջ հարյուր ոստիկաններ։
Իրավապահ մարմինների աշխատակիցները 19 ավտոմեքենա են ստուգել, 65 անձանց տուգանել են կարանտինային կանոնները խախտելու համար։ Կոմունայում իրավիճակը կայունացել է տեղական ժամանակով մոտ 23:00-ին (Երևանի ժամանակով` 02: 00-ին):
Ավելի վաղ հայտնել էինք, որ հարյուրավոր թուրք և ադրբեջանցի ազգայնականներ «հայերի որս» են սկսել Ֆրանսիայում։
Հիշեցնենք՝ երեկ Ֆրանսիայում հայ համայնքի կազմակերպած ակցիայի ընթացքում մի քանի թուրքեր մուրճերով, մահակներով և դանակներով հարձակվել էին հայերի վրա։ Թուրքերի հարձակման հետևանքով, ըստ նախնական տեղեկությունների, վիրավորվել է 10 հայ, որոնց թվում կին և երեխա կա։
