ԵՐԵՎԱՆ, 16 նոյեմբերի – Sputnik. Տորոնտոյում բնակվող լրագրող, պատմաբան Մայք Միխայլովիչը տեղեկացնում է, որ հայտնի են դարձել թուրք բարձրաստիճան զինծառայողների անունները, որոնք մասնակցել են ղարաբաղյան ռազմական գործողություններին։ Նա այդ մասին գրել է Twitter–ի իր էջում։
Գրառումներից մեկում, մասնավորապես, նա նշել է, որ ռազմական գործողություններում ներգրավված են եղել գեներալներ Բահթիար Էրսեյն ու Գյոքսել Կահյան։
As per some sources, the following high ranking 🇹🇷 officers are directly involved in 🇦🇿 military operations:
— Mike Mihajlovic (@MihajlovicMike) November 13, 2020
• Maj Gen Bahtiyar Ersay - personally supervises the 🇦🇿General Staff .
•Maj Gen Göksel Kahya, air force pic.twitter.com/UBWlk6ozkL
Կահյան բրիգադի գեներալ է։ Նա իրականացրել է Ադրբեջանի ռազմաօդային ուժերի ղեկավարությունը, վերահսկել օդային հետախուզման անցկացումը և անօդաչու թռչող սարքերով հարվածներ հասցնելու գործողությունները։
Էրսայը Թուրքիայի ԶՈւ գլխավոր շտաբի ղեկավարն է։ Թուրքիայի նախագահ Ռեջեփ Թայիփ Էրդողանը կարող էր միայն նրան վստահել այնպիսի կարևոր առաքելություն, ինչպիսին է «հակահարձակման» գործողությունը ԼՂ–ում։
Միևնույն ժամանակ «Վզգլյադ» պարբերականը, հղում անելով Ադրբեջանի ՊՆ աղբյուրներին, հայտնում է, որ Էրսեյի գլխավորած խումբն անմիջականորեն մասնակցել է Լեռնային Ղարաբաղի դեմ ռազմական գործողությունների կազմակերպմանը։ Գեներալն այժմ էլ գտնվում է Բաքվում, քանի որ Ադրբեջանի ԶՈւ գլխավոր շտաբի պետ Նաջմեդդին Սադիգովի պաշտոնանկությունից հետո նա անձամբ է վերահսկում գերատեսչությունը։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Նոյեմբերի 10-ի կեսգիշերին, ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն, ռազմական գործողությունները դադարեցվեցին։ Նոյեմբերի 15-ի ժամը 12.30-ի տվյալներով՝ Արցախի ՊԲ-ն հրապարակել է 1434 զոհված զինծառայողի անուններ։
Համացանցում լուր տարածվեց, որ հայկական կողմն ունի 4750 զոհ ու անհետ կորած։ Նոյեմբերի 14-ին ՀՀ առողջապահության նախարարությունը հայտնեց, որ դատաբժշկական ծառայությունը փորձաքննել է 2317 զոհված զինծառայողի դիակներ։
Վերջին տվյալներով` քաղաքացիական անձանց շրջանում կա 50 զոհ ու 148 վիրավոր։
Ադրբեջանն իր կորուստների վերաբերյալ պաշտոնական տեղեկություններ չի հայտնում, սակայն հայկական կողմի տվյալներով` Ադրբեջանի ԶՈւ–ն պատերազմի ընթացքում զրկվել է 264 ԱԹՍ-ից, 16 ուղղաթիռից, 25 ինքնաթիռից, 784 զրահատեխնիկայից, 6 ՏՕՍ-ից, 7660 կենդանի ուժից։
Ինչո՞ւ են ադրբեջանցիներն ուրախացել․ ռուսական խաղաղապահների հրամանատարի կենսագրությունը