ԵՐԵՎԱՆ, 10 մարտի – Sputnik. Ռուսաստանի արտաքին գործերի փոխնախարար Վլադիմիր Տիտովը և ԵԱՀԿ գործող նախագահի Հարավային Կովկասի հարցերով հատուկ ներկայացուցիչ Աննիկա Սեդերը այսօր քննարկել են Լեռնային Ղարաբաղում ստեղծված իրադրությունը: Տեղեկությունը հայտնում է Ռուսաստանի արտաքին քաղաքական գերատեսչության մամուլի ծառայությունը։
«Կողմերը մտքեր են փոխանակել Անդրկովկասի տարածաշրջանային իրավիճակի, այդ թվում՝ Լեռնային Ղարաբաղի հիմնախնդրի շուրջ»,-ասված է հաղորդագրության մեջ։
Քննարկվել են նաև ռուս-շվեդական երկկողմ հարաբերություններին վերաբերող արդիական հարցեր:
Հիշեցնենք` 2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
