ԵՐԵՎԱՆ, 17 մարտի - Sputnik. Լատվիայի 50-ից ավելի հայտնի արվեստագետներ, մտավորականներ ու մշակութային գործիչներ հանդես են եկել հայտարարությամբ, որով կոչ են անում Ադրբեջանին արագացնել զոհերի մարմինների և ռազմագերիների ու գերեվարված անձանց վերադարձը Հայաստանին: Տեղեկությունը հայտնում է Լատվիայում, Լիտվիայում և Էստոնիայում ՀՀ դեսպանությունը` ֆեյսբուքյան իր էջում գրառում անելով։
«Մենք` Լատվիայի արվեստագետներս, մտավորականներս ու մշակութային գործիչներս, միանալով մեր լիտվացի գործընկերներին, կոչ ենք անում Ադրբեջանի իշխանություններին չխոչընդոտել ռազմագերիների և գերու կարգավիճակում պահվող այլ անձանց, ինչպես նաև սպանված և զոհված զինվորների մարմինների անհապաղ վերադարձին ՀՀ: Մեր տեղեկություններով՝ Հայաստանն արդեն վերադարձրել է Ադրբեջանի բոլոր ռազմագերիներին»,–նշված է հայտարարության մեջ։
Արվեստագետները համոզված են, որ բոլոր ռազմագերիների առանց նախապայմանների և անհապաղ վերադարձը Ադրբեջանի և Հայաստանի միջև փոխվստահության վերականգնման համար անհրաժեշտ առաջնային քայլերից մեկն է:
Նրանք կոչ են անում միջազգային հանրությանը միանալ իրենց մարդասիրական նախաձեռնությանը՝ դրանով իսկ օգնելով վերջին պատերազմի պատճառով ԼՂ–ում հումանիտար աղետի հաղթահարմանը:
Շղթայակապ աղջիկներն ԱԺ-ի մոտ պահանջում են անհապաղ վերադարձնել գերիներին
Նշենք, որ այս հայտարարության տակ ստորագրել են հայտնի մշակութային գործիչներ Լաորիս Գունդարսը, Րաֆֆի Խարաջանյանը, Նորա Իկստենան, Մայա Կուլեն, Այնարս Ռոզեն, Մառա Զալիտեն և այլք։
