ԵՐԵՎԱՆ, 16 ապրիլի - Sputnik. Թուրքիայի նախագահ Ռեջեփ Թայիփ Էրդողանը պաշտպանել է արտգործնախարար Մևլութ Չավուշօղլուին, որը երեկ շատ կտրուկ էր արձագանքել Հունաստանի արտգործնախարար Նիկոս Դենդիասի ասածին։ Տեղեկությունը հայտնում են թուրքական ԶԼՄ-ները:
«Մեր արտգործնախարարը նրան (Հունաստանի արտգործնախարարին) տեղն է դրել` ի պատասխան նրա պահվածքի և վերաբերմունքի», - ասել Է Էրդողանը:
Նրա խոսքով ՝ Չավուշօղլուն այդ իրավիճակում չէր կարող լռել։
Երեկ Չավուշօղլուն և Դենդիասն Անկարայում բանակցություններ են անցկացրել, որոնք ավարտվել են միմյանց ուղղված կտրուկ արտահայտություններով։
Հանդիպման սկզբում նախարարները լրագրողներին հայտարարել են, որ պատրաստ են երկխոսության և տնտեսական համագործակցության։ Դենդիասն ասել է, որ Հունաստանում թուրքական փոքրամասնություն չկա, կա միայն մահմեդական փոքրամասնություն: Նա նշել է, որ Թուրքիան խախտում Է Հունաստանի ինքնիշխան իրավունքները, իսկ պատերազմի վտանգը բարդացնում է հարաբերությունները, երբ Հունաստանը խոսում է իր ինքնիշխան իրավունքների իրականացման մասին, որոնք բխում են միջազգային իրավունքից:
«Ցավոք, Նիկոս Դենդիասը մի քանի խիստ անթույլատրելի մեղադրանքներ հնչեցրեց իմ երկրի հասցեին։.. Մենք նման հայտարարություններ չենք կարող ընդունել։ Մեր գործողություններն ուղղված են Հունաստանում թուրք-կիպրոսցիների և թուրքական փոքրամասնության իրավունքների պաշտպանությանը»,– ի պատասխան ասել է Չավուշօղլուն։
Նրա խոսքով ՝ Թուրքիան Միջերկրական ծովում ածխաջրածինների հանքավայրերի հետախուզման ուղղությամբ իր գործունեությունը ծավալում է միջազգային իրավունքի շրջանակներում։
Ռուսաստանը փակում է Թուրքիայի օդը. ի՞նչ է լինելու 2021 թվականի զբոսաշրջային սեզոնի հետ
Դենդիասն ի պատասխան հայտարարել է, որ Հունաստանի դիրքորոշումը Էգեյան ծովի վերաբերյալ հայտնի է և պարզ: Նա հայտարարել Է Հունաստանի օդային տարածքի հարյուրավոր խախտումների մասին։
«Ինչ վերաբերում է թուրքական փոքրամասնությանը, այդ մասին գրված է Լոզանի պայմանագրում։ Թուրքիան ուզի, թե չուզի, բայց Լոզանի պայմանագիրը գործում է։ Թուրքիան մշտապես խախտում է միջազգային իրավունքը։ 2020 թվականի փետրվարից և մարտից հետո (երբ հազարավոր միգրանտներ փորձել են սահմանը հատել Հունաստան – խմբ.) Թուրքիան չի կարող խրատել Հունաստանին», - նշել է նա։
Այնուհետև հույն նախարարն առաջարկել է չվերադառնալ անվերջանալի վեճին։
Չավուշօղլուն հայտարարել է, որ եթե Հունաստանը խոսում է Լոզանի պայմանագրի մասին, ապա պետք է կղզիների ապառազմականացում իրականացնի, և նշել է, որ Թուրքիան չի ճանաչել Հունաստանի 10-կիլոմետրանոց օդային տարածքը:
«Եթե մենք շարունակենք այստեղ հարաբերությունները պարզել, մենք չենք հասցնի ընթրիքին», — հավելել Է Չավուշօղլուն, և դրանից հետո նրանք ծիծաղելով ավարտել են ասուլիսը:
Թուրքերը մեր թշնամի՞ն են. Նիկոլ Փաշինյանը պատասխանեց այս հարցին
Հիշեցնենք` վերջին շրջանում Աթենքի և Անկարայի հարաբերությունները կտրուկ սրվել են։ Դա պայմանավորված է նրանով, որ թուրքական «Oruc Reis» նավը սեյսմիկ հետազոտություններ էր իրականացնում Միջերկրական ծովի արևելյան մասում, որը Հունաստանը համարում է իր բացառիկ տնտեսական գոտին: Հունաստանի զինված ուժերը բերվել էին բարձր մարտական պատրաստության։ Թուրքիան նաև ուսումնասիրություններ է իրականացրել Կիպրոսի մոտ։ Հունաստանը միջազգային բոլոր հանդիպումներում բարձրացնում է Թուրքիայի գործողությունների հարցը։
