ԵՐԵՎԱՆ, 17 հունիսի – Sputnik. Թուրքիայի նախագահ Ռեջեփ Թայիփ Էրդողանը հայտարարել է առաջիկայում ռուս գործընկեր Վլադիմիր Պուտինի հետ հանդիպման մասին։ Տեղեկությունը հայտնում է թուրքական «Vatan» թերթը:
«Շուտով երկկողմ հանդիպում կունենամ պարոն Պուտինի հետ»,- Ադրբեջան կատարած աշխատանքային այցից վերադառնալուց հետո հայտարարել է Էրդողանը թուրքական ԶԼՄ-ներին տված հարցազրույցում։
Թուրքիայի նախագահն անդրադարձել է նաև այսպես կոչված Զանգեզուրի միջանցքի ստեղծմանը։ «Այս պահին ես չեմ կարծում, որ ռուսական կողմը տարաձայնություններ կամ Զանգեզուրի միջանցքի շուրջ աշխատանքը հետաձգելու մտադրություններ ունի։ Ընդհակառակը` Ռուսաստանը որպես օգնական է հանդես գալիս»,-ասել է Էրդողանը։
Անկարան շատ կարևոր է համարում Ադրբեջանի նախաձեռնած Զանգեզուրի միջանցքը և աջակցում է այդ նախագծին։
«Իհարկե, դա մեծ առավելություններ կբերի Հայաստանին։ Ռուսաստանը նույնպես դրական է վերաբերվում այդ հարցին։ Որովհետև դա կարևոր միջանցք է, կարևոր գիծ», -ասել է Էրդողանը։
Լավրովը Երևանում անդրադարձել է «Զանգեզուրի միջանցքին»
Սյունիքի մարզի տարածքում այսպես կոչված Զանգեզուրի միջանցքի ստեղծման նախաձեռնողը Ադրբեջանի նախագահ Իլհամ Ալիևն է։ Նա ցանկանում է Ադրբեջանի տարածքն այդպես միացնել Նախիջևանի և Թուրքիայի հետ։ Նախագիծն ամրագրված է նաև Ալիևի ու Էրդողանի` Շուշիում ստորագրած հռչակագրում։
Ավելի վաղ Նիկոլ Փաշինյանը հայտարարել էր տարածաշրջանում տրանսպորտային հաղորդակցությունները ապաշրջափակելու ցանկության մասին, բայց վստահեցրել էր, որ Զանգեզուրի միջանցքի վերաբերյալ որևէ պայմանավորվածություն չկա:
Ալիևը բացատրել է, թե ինչու է «Զանգեզուրի միջանցքը» քննարկվում Ռուսաստանի հետ
