ԵՐԵՎԱՆ, 30 հուլիսի – Sputnik. Եվրոպայի Խորհրդի խորհրդարանական վեհաժողովում «Հայաստանի և Ադրբեջանի միջև հակամարտության հումանիտար հետևանքները» թեմայով զեկուցող Փոլ Գավանը (Իռլանդիա, «Եվրոպական միավորված ձախեր» խմբակցություն) կոչ է արել Հայաստանի և Ադրբեջանի ղեկավարներին պահպանել հրադադարի ռեժիմը։ Տեղեկությունը հայտնում է ԵԽԽՎ պաշտոնական կայքը` հավելելով, որ Գավանը նշել է, որ հրադադարը պետք է վերականգնել սահմանային գոտում վերջերս տեղի ունեցած միջադեպերից հետո, որի հետևանքով հայկական կողմից 3, իսկ ադրբեջանական կողմից 1 զինծառայող զոհվեց:
«Դժբախտաբար, այս տարվա մայիսից հուլիս ընկած ժամանակահատվածում կողմերի միջև միջադեպերի քանակն աճել է։ Այս միջադեպերը լարվածությունը հասցրել են նոր մակարդակի՝ զինվորների վիրավորումներով և մարդկային կորուստներով։ Սա ինձ շատ է անհանգստացնում։ Ես կապի մեջ եմ եղել երկու կողմերի հետ, և կարող եմ ասել` երկուսն էլ ուզում են խուսափել իրադրության վատթարացումից»,–ասել է նա։
Գավանի խոսքով` քանի դեռ բռնությունը չի դադարեցվել, չեն կարող լուծվել հումանիտար այն հիմնախնդիրները, որոնք սահմանի երկու կողմերում գտնվող անձանց կյանքի վրա են ազդում։ Նա կոչ է արել նրանց, ովքեր անհանգստացած են այս վիճակով, ցույց տալ իրենց պատասխանատվությունը խաղաղության և հաշտեցման գնալու հարցում։
«Հետևաբար, հույս ունեմ, որ 2 երկրները հետ կկանգնեն իրավիճակն ավելի վատթարացնող քայլերից: Մենք պետք է խոսափենք հակամարտության այս շարունակական շրջապտույտից»,–ասել է Գավանը:
ԵԽԽՎ կայքում նշվում է, որ Գավանն իր զեկույցը նախատեսում է ներկայացնել ԵԽԽՎ-ի հաջորդ լիագումար նիստի ժամանակ (սեպտեմբերի 27-ից հոկտեմբերի 1):
Հիշեցնենք` հունիսի 30-ին հայտնի դարձավ, որ Եվրոպայի խորհրդի Խորհրդարանական վեհաժողովի հատուկ զեկուցող Փոլ Գավանը Բաքվում հանդիպում կունենա հայաստանցի ռազմագերիների հետ։
Հիշեցնենք` հուլիսի 28-ին ադրբեջանական ԶՈւ ստորաբաժանումները հերթական անգամ դիմել էին սադրանքի և խախտել հրադադարը հայ-ադրբեջանական սահմանի հյուսիսարևելյան հատվածում: Հայաստանն ու Ադրբեջանը համաձայնել էին Մոսկվայի միջնորդությամբ դադարեցնել կրակը։
Ադրբեջանական ստորաբաժանումները, տալով կորուստներ, հետ են շպրտվել. ՊՆ
Հայկական կողմն ունի երեք զոհ, հինգ վիրավոր։
Հուլիսի 29-ին` ժամը 03:00-ի սահմանում, հայ-ադրբեջանական սահմանի Գեղարքունիքի հատվածում, Քարվաճառի ուղղությամբ ադրբեջանական ԶՈւ ստորաբաժանումները, խախտելով նախորդ օրը ձեռք բերված` կրակի դադարեցման վերաբերյալ պայմանավորվածությունը, կրկին դիմել էին սադրանքի ու կրակ բացել հայկական դիրքերի ուղղությամբ։
Հայ-ադրբեջանական սահմանի Գեղարքունիքի հատվածում արձանագրվել են ԱԹՍ-ների՝ ՀՀ օդային տարած մուտք գործելու փորձեր։
Այսօր` հուլիսի 30–ին, Խոցվել է Ադրբեջանի ԶՈւ սպառազինության մեջ գտնվող «Aerostar» տիպի ԱԹՍ, որի բեկորներն ընկել են Գեղարքունիքի մարզի Վանեվան գյուղից 3.5 կիլոմետր դեպի հյուսիս։
