ԵՐԵՎԱՆ, 11 հուլիսի– Sputnik. Մինչև տարեվերջ Սևանա լիճ բաց կթողնվի իշխանի մոտ 600 հազար մանրաձուկ, հայտարարել է ՀՀ բնապահպանության նախարար Արամայիս Գրիգորյանը։
Ինչպես հաղորդում է ՀՀ բնապահպանության նախարարության մամուլի ծառայությունը, նախօրեին Սևանա լճի Վարդենիսի տարածաշրջանի Կարճաղբյուր գետի գետաբերանում բաց է թողնվել իշխանի 200.000 մանրաձուկ «Սևանի իշխանի պաշարների վերականգնման և ձկնաբուծության զարգացման» հիմնադրամի կողմից մանրաձկան անհատույց տրամադրման գործընթացի շրջանակում:
«Չենք կարող ասել, որ այս քանակությամբ մանրաձուկ բաց թողնելով ամբողջովին խնդիրը լուծում ենք, սակայն հետևողականորեն գնում ենք այդ ուղղությամբ», – նախարարության մամուլի ծառայությունը մեջբերում է Գրիգորյանի խոսքերը։
Նախարարը տեղեկացրել է, որ նախատեսվում է նոյեմբերին ևս 370.000 մանրաձուկ բաց թողնել Սևանա լիճ, իսկ ծրագրի իրականացման արդյունքները տեսանելի կլինեն մեկ-երկու տարի հետո:
Նախարարը նաև կարևորել է տարածքի ազգաբնակչության իրազեկվածության մակարդակի բարձրացումը` ձկան ձվադրման շրջանում որսագողության դեպքերը բացառելու համար։
Սևանա լիճը Եվրոպայի և Ասիայի ամենաբարձր և մեծ լեռնային լճերից մեկն է, գտնվում է Հայկական բարձրավանդակի սրտում՝ 1914 մ բարձրության վրա։ Երկարությամբ՝ հյուսիս-արևմուտքից դեպի հարավ-արևելք, լիճը ձգվում է ավելի քան 70 կմ, իսկ նրա ջրային հայելու մակերեսը հասնում է գրեթե 1500 քառակուսի մետրի։ Լիճը տարածաշրջանում խմելու ջրի գլխավոր ռեսուրսն է։ 2030 թ.–ին լճի մակարդակը կբարձրացվի մինչև 1903,5 մ–ի։
Նախարար. մինչև տարեվերջ Սևանա լիճ բաց կթողնվի իշխանի 600 հազար մանրաձուկ
© Sputnik / В. Селезнев
/ Բաժանորդագրվեք
ՀՀ բնապահպանության նախարար Արամայիս Գրիգորյանը տեղեկացրել է, որ Սևանա լճի ձկան պաշարների վերականգնման ծրագրի իրականացման արդյունքները տեսանելի կլինեն մեկ-երկու տարի հետո:
