ԵՐԵՎԱՆ, 14 ապրիլի — Sputnik. ԵՏՀ ջանքերի շնորհիվ հնարավոր է դարձել Միության երկրների տարածքում իջեցնել ռոումինգում ձայնային ծառայության սակագինը, հայտնել են ԵՏՄ անդամ երկրների հակամենաշնորհային մարմնի ղեկավարները։
ԵՏՀ, ԵՏՄ հակամենաշնորհային մարմինների և բջջային կապի օպերատորների համատեղ աշխատանքի արդյունքում 2-ից 7 անգամ իջեցվել է ռոումինգում ձայնային ծառայությունների սակագինը։
Մասնավորապես, Հայաստանում` «ԱրմենՏել» ՓԲԸ («Beeline» ապրանքանիշ) գները նվազել են 7 անգամ` 1133 դրամ/րոպեից մինչև 163 դրամ/րոպե, «Ucom» ՓԲԸ-ինը մինչև 4 անգամ` 559 դրամ/րոպեից մինչև 149 դրամ/րոպե, VivaCell-MTS ՓԲԸ-ինը մինչև 2 անգամ` 305 դրամ/րոպեից մինչև 149 դրամ/րոպե։
Ծառայությունների սակագների իջեցումը ռոումինգում թույլ կտա զարգացնել տնտեսական ինտեգրումը, ապահովել տնտեսական առաջընթաց, ընդլայնել տնտեսության տարբեր ոլորտների համատեղ նախագծերը, ինչպես նաև ԵՏՄ պետությունների միջև ավելացնել զբոսաշրջային հոսքը։
Հիմնականում քննարկվել են օրենսդրության ներդաշնակեցմանը և ԵՏՄ երկրների միջազգային բջջային կապի ոլորտի խոչընդոտների վերացմանը, ԵՏՄ անդրսահմանային շուկաներում մատակարարման և դիլերային համաձայնագրերի կնքման հակամրցակցային գործընթացին վերաբերող արդիական հարցեր։
Եվրասիական տնտեսական միությունը տարածաշրջանային տնտեսական ինտեգրման միջազգային կազմակերպություն է։ Եվրասիական տնտեսական միության անդամ պետություններն են Հայաստանը, Բելառուսը, Ղազախստանը, Ղրղըզստանը և Ռուսաստանը: ԵՏՄ-ն ստեղծվել է ազգային տնտեսությունների բազմակողմանի արդիականացման, կոոպերացիայի, մրցունակության բարձրացման և անդամ պետությունների բնակչության կենսամակարդակի բարձրացման համար կայուն պայմաններ ստեղծելու նպատակով:
