ԵՐԵՎԱՆ, 22 ապրիլի — Sputnik. Երևան են ժամանում մարդասիրական առաջին «Ավրորա» մրցանակի հիմնադիրները, հավակնորդները և հյուրերը, հայտնում են մրցանակի կազմկոմիտեից։
Արդեն Երևանում են հայտնի շանսոնիե Շառլ Ազնավուրը, հիմնադիրներ Նյու Յորքի Կարնեգի կորպորացիայի նախագահ Վարդան Գրեգորյանը և աշխարհահռչակ դերասան Ջորջ Քլունին։ Իսկ մրցանակի հավակնորդներից Հայաստանի մայրաքաղաքում են Մարգարիտ Բարանկիցեն և Հայր Բերնար Կինվին։
«Ավրորա» մրցանակը դափնեկրին կշնորհի Ընտրող հանձնաժողովի համանախագահ Ջորջ Քլունին ապրիլի 24-ին Երևանում:
Առաջին «Ավրորային» հավակնում են Մարգարիտ Բարանկիցեն Բուրունդիից, դոկտոր Թոմ Քաթինան Սուդանից, Սայիդա Ղուլամ Ֆաթիման Պակիստանից և Հայր Բերնարդ Կինվին՝ Կենտրոնական Աֆրիկայի Հանրապետությունից:
«Ավրորա» մրցանակը հիմնել են 100 LIVES նախաձեռնության հիմնադիրները՝ որպես երախտագիտություն նրանց, ովքեր Հայոց ցեղասպանության տարիներին փրկության ձեռք մեկնեցին հայերին: Ամենամյա այս մրցանակը ստեղծվել է մարդկության ուշադրությունը ևս մեկ անգամ ուղղելու աշխարհում այսօր տեղի ունեցող աղետներին ու ոճրագործություններին և խրախուսելու այն հերոսների ջանքերը, որոնք մարդկային կյանքեր են փրկում:
