ԵՐԵՎԱՆ, 10 մայիսի- Sputnik. Եվրամիությունը ողջունում է Ղարաբաղում ռազմական գործողությունների ժամանակ վայրագությունների հետաքննությունը և մեղավորներին պատժելը, լրագրողներին Երևանում ասաց Հարավային Կովկասի և Վրաստանի ճգնաժամի հարցերով ԵՄ Հատուկ ներկայացուցիչ Հերբերտ Զալբերը ԼՂՀ ԱԳ նախարար Կարեն Միրզոյանի հետ հանդիպումից հետո։
Ավելի վաղ Հայաստանի ՊՆ-ն հայտարարել էր, որ միջազգային ատյաններում ներկայացնելու է Ադրբեջանի կողմից միջազգային մարդասիրական իրավունքը և կոնվենցիաները խախտելու փաստերը։
«Մենք երկու կողմից էլ մեղադրանքներ ունենք։ Եվրամիության համար շատ բարդ է գնահատական տալը։ Մի բան պարզ է, որ մենք դատապարտում ենք բոլոր վայրագությունները, որոնք կատարվել են։ Մենք ողջունում ենք մեղավորներին պատժելուն ուղղված գործերի հետաքննությունը»,- ասաց Զալբերը` պատասխանելով ադրբեջանական կողմի հանցագործությունների մասին լրագրողի հարցին։
Նրա խոսքով` քննարկման հիմնական թեման եղել է տարածաշրջանում իրավիճակը, սակայն հրադադարի ռեժիմի խախտումների հետաքննության հարցը չի քննարկվել։
«Ես չեմ հրաժարվում այցելել Լեռնային Ղարաբաղ։ Ես կցանկանայի լինել այնտեղ` իրադրության մասին սեփական կարծիք ունենալու համար։ Ես կոոպերատիվ անվտանգության մեծ կողմնակից եմ, մենք աշխատում ենք այդ ուղղությամբ։ Հենց նման որոշում լինի, ես անպայման կայցելեմ»,- ասաց նա։
Նրան նաև հարցրեցին Բաքու այցելելու հնարավորության մասին, նա պատասխանեց, որ կանոնավոր կերպով այցելում է Հայաստան և Ադրբեջան` քննարկումներ անցկացնելու համար։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
