ԵՐԵՎԱՆ, 30 մայիսի — Sputnik. Քանդակագործ Ֆերդինանդ Առաքելյանը Հռոմի պապի համար սեփական ձեռքերով հատուկ նվեր է պատրաստել։ Նվերը նա նախատեսում է հանձնել Հայաստան Հռոմի պապի այցի շրջանակում։
Հայաստան Հռոմի պապի այցը նախատեսված է հունիսի 24-26-ը։ Ուղևորության ծրագրում է հանդիպում նախագահ Սերժ Սարգսյանի և Ամենայն Հայոց Գարեգին Երկրորդ Կաթողիկոսի հետ, ինչպես նաև այցելություն «Ծիծեռնակաբերդի» հուշահամալիր։ Այնուհետև կաթոլիկ եկեղեցու ղեկավարը կմեկնի Գյումրի, որտեղ պատարագ կմատուցվի Վարդանանց հրապարակում։
Քանդակագործի խոսքով` Հռոմի պապի այցը շատ կարևոր իրադարձություն է հայերի համար։
«Երբ նա ճանաչեց Ցեղասպանությունը, իմ մոտ միտք հղացավ անպայման որևէ բան անել նրա համար։ Երկու ամիս ես աշխատում եմ հարթաքանդակի վրա, այն նվիրված է լինելու նրա գործունեությանը։ Աշխատանքը կոչվում է «Լռության րոպե»», — նշեց քանդակագործը։
Հարթաքանդակի կենտրոնում պատկերված է Կենաց ծառը, կողքին շուրջ 200 պատկեր է` տարբեր եկեղեցիների ներկայացուցիչներ` քրիստոնյաներ, բուդդիստներ, հրեաներ, մահմեդականներ, ովքեր մեկ րոպե լռությամբ հարգում են Հայոց ցեղասպանության զոհերի հիշատակը։
«Կենտրոնում Կենաց ծառն է։ Մենք շարունակում ենք ծաղկել, և աշխարհը եկել է այդ ծառի մոտ, որպեսզի հարգանքի տուրք մատուցի ոչ միայն Հայոց ցեղասպանության, այլև բոլոր` Ռուանդայի, Հոլոքոստի զոհերի հիշատակին», — ասաց Առաքելյանը։
Քանդակը մոտ 4 մետր լայնություն և 1 մետր երկարություն ունի։ Որոշ տարրեր արված են ոսկու և բրոնզի կիրառմամբ։ Հարթաքանդակը հասարակությանը ներկայացվելու է Հռոմի պապի այցից մի քանի օր առաջ։
«Կարևոր չէ` կընդունի՞ Պապն այս նվերը ու կտանի՞ իր հետ Հռոմ, կարևորը, որ այն ներկայացված կլինի նրան», — ասաց Առաքելյանը։
Հարթաքանդակի հեղինակը վստահ է, որ աշխատանքը լավ է ստացվել։
Գրականագետ Աշոտ Եղիազարյանը, ով միակ մարդն է, բացի հեղինակից, որ տեսել է հարթաքանդակը, նույնպես կարծում է, որ Պապի այցը շատ կարևոր է։
Նրա խոսքով` այդ մարդը, բացի սեփական կարգավիճակից, մարդասիրության և արդարության ուժեղ զգացում ունի։
«Մեր հասարակությունը պետք է և կողջունի այդ այցը։ Նրա գործունեությունը խիստ տարբերվում է կաթոլիկ եկեղեցու նախորդ ղեկավարների գործունեությունից», — ասաց Եղիազարյանը։
Նա ցավով նշեց, որ Պապին հնարավոր չի լինի ցույց տալ ամբողջ Հայաստանը, սակայն նա պետք է ևս մեկ անգամ համոզվի, որ հայ ժողովուրդը մարդասիրական, համամարդկային արժեքներ ունի։
«Փոքր հայ ժողովուրդն այնպիսի մշակույթ ունի, որը պետք է ցույց տալ ամբողջ աշխարհին։ Այդ մշակույթի հիմքում մարդասիրությունն է», — ասաց Եղիազարյանը։
Նրա խոսքով` հենց այս քանդակում նման կարևոր իմաստ է ներդրված։ Նա ընդգծեց, որ շատ կարևոր է ներկայացնել, որ բոլոր հիմնական կրոնները մեկ գաղափարի, համամարդկային արժեքների են ձգտում։
Հարթաքանդակը, գրականագետի խոսքով, շատ գեղեցիկ է ստացվել, և այն պետք է որ դուր գա Հռոմի պապին։
