Նոյեմբերի 27-ին Կարեն Դեմիրճյանի անվան մարզահամերգային համալիրում FORPOSTART փրոդաքշնն ու պրոդյուսեր Արի Զաքարյանը կներկայացնեն բացառիկ և անկրկնելի "KINGS ON ICE PRESENT FASHION ON ICE" շոուն։ Շոուն բեմադրելու համար հրավիրվել են հատուկ պարուսույցներ, ռեժիսորներ, սցենարիստներ, նկարիչներ։ Sputnik Արմենիայի համար Արի Զաքարյանը բացահայտել է նոր շոուի մանրամասները։
- Արի, Դուք սառցե շոուներ եք կազմակերպում աշխարհի տարբեր երկրներում։ Ինչո՞վ է բացառիկ "KINGS ON ICE PRESENT-FASHION ON ICE"-ը։
— Աշխարհում առաջին անգամ է նման ձևաչափի շոու կազմակերպվում։ Այն կհամախմբի արվեստի տարբեր ժանրերն ու նորաձևությունը։ Հագուստը մեծ դեր է խաղում գեղասահքում, ելույթ ունենալուց առաջ յուրաքանչյուր գեղասահորդ մոդելիերների հետ քննարկում է, թե ինչպիսին պետք է լինի նրա բեմական զգեստը։
Այդ մասին մտածելով` մենք որոշեցինք ստեղծել այս շոուն։ Սա տարբերվում է նախորդներից, քանի որ հանդիսատեսը կտեսնի ռեժիսորական և բեմական լավ աշխատանք։ Ինձ հետ ջանք չխնայելով աշխատում է Էմիլ Կարատը։ Ես շատ շնորհակալ եմ Զառա Մխեյանին, ում հետ մենք կյանքի կկոչենք այս նախագիծը։
-Ի՞նչ կտեսնի հանդիսատեսը այդ շոուի ընթացքում։ Ո՞վ է մասնակցում ներկայացմանը։
— Ինչպես միշտ, հանդիսատեսին մենք հետաքրքիր և լավ համարներ, բարդ ներկայացում կցուցադրենք։ Ծրագրին կմասնակցեն ռուս երգիչներ և երաժիշտներ, ինչպես նաև պարային համույթներ, կրկեսի և օրիգինալ ժանրի դերասաններ, հայ գեղասահորդներ։ Ելույթ կունենա լեգենդար գեղասահորդ Եվգենի Պլյուշչենկոն, առաջին անգամ Հայաստան կժամանեն Ադելինա Սոտնիկովան և Ֆլորիան Ամոդիոն, ինչպես նաև հանդես կգան հայ գեղասահորդներ Անաստասիա Գալուստյանն ու Սլավիկ Հայրապետյանը։ Շոուի ժամանակ ելույթ կունենան Հայաստանի և Ռուսաստանի կատարողներ, ինչպես նաև վիրտուոզ ջութակահար Էդգար Հակոբյանը։ Նոր ծրագիր է սպասվում, որն, անկասկած, դուր կգա հանդիսատեսին։
-Այս տարվա մարտին Դուք կազմակերպեցիք «Սառույցի արքաները» շոուն, որին մասնակցեց Եվգենի Պլյուշչենկոն։ Որքանո՞վ էր այն հաջողված։
— «Սառույցի արքաները» սառցե շոուն, հավանաբար, լավագույնն էր, որը կարող էի բերել Հայաստան։ Այդ շոուն մենք ցուցադրում ենք ամբողջ աշխարհում, և ես շատ ուրախ եմ, որ մենք վերջապես կարողացանք այն բերել Հայաստան։ Մենք հովանավորներ չունեինք, և ես բոլոր ֆինանսական հարցերը վերցրի ինձ վրա։ Ինձ օգնեց Զառա Մխեյանը։ Կարծում եմ, որ հանդիսատեսին շատ դուր եկավ։ Մասնակիցներին նույնպես հաճելի էր գտնվել Հայաստանում։ Հուսով եմ` հայ հանդիսատեսը կմասնակցի մեր ապագա նախագծերին։
- Արդյոք լուծվա՞ծ են շոուի հետ կապված բոլոր տեխնիկական հարցերը։ Ի՞նչ փուլում են նախապատրաստական աշխատանքները։
— Մի քանի շաբաթ է մնացել։ Միշտ, երբ խոշոր միջոցառում ես կազմակերպում, ժամանակը չի բավականացնում, դժվարություններ են լինում։ Ժամանակի հետ ամեն ինչ կհարթվի։ Ուրախ կլինեմ, եթե Հայաստանում գաղասահքը սիրելի և հայտնի մարզաձև դառնա։
Ուրախ եմ, որ Ռուսաստանի կառավարությունն այդքան աջակցում է գեղասահքի առաջխաղացմանը։ Նման վերաբերմունք այս մարզաձևի նկատմամբ Հայաստանում չկա։ Շատ հայ գեղասահորդներ մասնակցում են մրցումների` ներկայացնելով այլ երկրներ, քանի որ Հայաստանում նրանց չեն օգնում։ Դա շատ ցավալի է։ Շնորհակալ եմ Իրինա Ռոդնինային, որ նա գումար է հատկացրել և Հայաստանում գեղասահքի դպրոց է բացել, որտեղ մարզվում են երիտասարդները։
