ԵՐԵՎԱՆ, 22 փետրվարի — Sputnik. Հայաստանի պաշտպանության նախարար Վիգեն Սարգսյանը ՌԻԱ Նովոստիին տված հարցազրույցում հայտնել է, որ Հարավային Կովկասի տարածաշրջանի անվտանգության գլխավոր սպառնալիքն Ադրբեջանն է։
Հարցին, թե արդյոք մտավախություն չկա՞, որ տարածաշրջանում սպառազինության քանակի ավելացումը կարող է լայնածավալ պատերազմական գործողությունների հանգեցնել, նախարարը պատասխանեց.
«Չեխովին ոչ ոք չեղյալ չի հայտարարել. եթե առաջին գործողության մեջ զենք կա բեմում, ապա երկրորդում, այն ամենայն հավանականությամբ պետք է կրակի, սակայն իրական վտանգը սպառազինության քանակը չէ և ոչ էլ տեսակները, այլ այդ սպառազինության կառավարման համակարգը»։
Նա ընդգծել է, որ ցանկացած տարածաշրջանում կայունությունն ու խաղաղությունը կարող է ապահովվել միայն իշխանության լուրջ ժողովրդավարական ինստիտուտների համակարգով։
«Կարծում եմ, որ Հարավային Կովկասի համար հիմնական սպառնալիքը Ադրբեջանում գոյություն ունեցող կառավարման այն ռեժիմն է, որը լիովին զրկված է ԶՈՒ-ի նկատմամբ ժողովրդավարական վերահսկման ձևերից, և այդ առումով կարևոր չէ, թե որքան և ինչ սպառազինություն կա այնտեղ։ Ավելի կարևոր է, որ գտնվի այնպիսի ուժ, որի համար այդ զենքը կիրառելու որոշումը տրամաբանական եզրակացությունների հիման վրա լինի»,- ասել է Սարգսյանը։
Նա նշել է, որ «սպառազինության լիմիտի սահմանումը կարող էր զսպվածության կամ վերահսկման կարևոր գործոն դառնալ հակամարտության սրման ներուժի նկատմամբ»։
