ԵՐԵՎԱՆ, 6 մարտի — Sputnik. Ռուսաստանի և Ադրբեջանի արտաքին գործերի նախարարներ Սերգեյ Լավրովի ու Էլմար Մամեդյարովի այսօր կայանալիք բանակցությունների հիմքում տարածաշրջանային և միջազգային խնդիրներն են, այդ թվում՝ ղարաբաղյան հակամարտության կարգավորման հարցը: Այս մասին տեղեկացնում է ՌԴ արտգործնախարարության կայք էջը։
«Ռուսաստանն ավելի քան երկու տասնամյակ առանցքային միջնորդ է ղարաբաղյան հակամարտության կարգավորման հարցում, քանի որ նաև ԵԱՀԿ Մինսկի համանախագահ է։ Հաշվի առնելով մեր ժողովուրդների աշխարհագրական մերձությունն ու ընդհանուր պատմությունը՝ մեզ համար կարևորագույն խնդիր է լուծել այս հակամարտությունը», — նշել են Ռուսաստանի արտգործնախարարությունում:
Հայտարարության մեջ նաև ասվում է, որ Ռուսաստանի արտաքին քաղաքականության առաջնահերթություններից է աջակցել կողմերին լուծելու արցախյան հակամարտությունը:
Հիշեցնենք, որ փետրվարի վերջին ՌԴ արտգործնախարարի հրավերով պաշտոնական այցով Մոսկվայում գտնվող ՀՀ արտգործնախարար Էդվարդ Նալբանդյանի հետ ևս քննարկվել են արցախյան հակամարտության կարգավորմանն ուղղված հարցեր։