ԵՐԵՎԱՆ, 10 մարտի — Sputnik. Ղարաբաղյան հիմնախնդրի կարգավորման ուղղությամբ բանակցություններ այսօր չեն ընթանում այն պատճառով, որ Ադրբեջանի կողմից Արցախի դեմ ապրիլյան նոր ագրեսիայով շատ լուրջ հարված հասցվեց բանակցային գործընթացին։ Այս մասին հայտարարեց ՀՀ արտգործնախարար Էդվարդ Նալբանդյանը` Երևանում Հունաստանի արտաքին գործերի նախարար Նիկոս Կոցիասի հետ համատեղ ասուլիսի ընթացքում։
Նախարարը հիշեցրեց, որ բանակցային գործընթացը հետ է մղվել ապրիլյան ագրեսիայից հետո։ Այդ պատճառով Հայաստանն ու եռանախագահող երկրները շարունակում են ջանքերն` ուղղված համապատասխան պայմաններ ստեղծելուն, որպեսզի բանակցային գործընթացներն առաջ մղվեն։ Այդպես կայացան Վիեննայի, Սանկտ-Պետերբուրգի գագաթաժողովները, որոնց ընթացքում ձեռք բերվեցին պայմանավորվածություններ:
«Միջազգային հանրությունը, Հայաստանը, եռանախագահները խոսում են մեկ լեզվով, Ադրբեջանն այլ լեզվով: Ադրբեջանն է հրաժարվում իրականացնել այդ գագաթաժողովների ժամանակ ձեռք բերած պայմանավորվածությունները: Երբ, եթե հանդիպումներ են կայանում, պայմանավորվածություններ են ձեռք բերվում, հետո չենք իրականացում, հարց է առաջանում՝ արդյո՞ք Ադրբեջանն իսկապես պատրաստ է բանակցությունների, դրանց ընթացքում ձեռք բերած պայմանավորվածությունների իրականացմանը»,- ասաց Նալբանդյանը։ Նախարարը ընդգծեց, որ բանակցային գործընթացին այլընտրանք չկա: