ԵՐԵՎԱՆ, 15 մարտի — Sputnik. Sputnik գործակալության և RT հեռուստաընկերության գլխավոր խմբագիր Մարգարիտա Սիմոնյանը RNS-ին տված հարցազրույցում պատմել է, թե Sputnik-ն ինչ խնդիրների է բախվում Մերձբալթյան երկրներում։ Սիմոնյանը խոսել է նաև այն մասին, որ հատուկ ծառայությունները կարդում են աշխատակիցների նամակներն ու գաղտնալսում նրանց զրույցները։
Նրա խոսքով` Մերձբալթյան երկրներից մեկում Sputnik գործակալությունում աշխատանքի անցնելու համար հարցազրույցի եկած մարդկանց կանչում են ՆԳՆ ու հարցաքննում նրանց։
«Հարցնում են` ուզո՞ւմ ես դավաճանել հայրենիքդ։ Պատկերացնո՞ւմ եք` նման բան լիներ մեզ մոտ, մարդիկ գնային «Ազատություն» ռադիոկայանում աշխատանքի անցնելու, հաջորդ օրը նրան զանգեին ու հարցեր տային։ Դա այն վատագույնն է, որ եղել է Խորհրդային Միությունում. ընդ որում` մեզ մոտ նման բան չկա, իսկ նրանց մոտ կա։ Հիմա անհասկանալի է` Խորհրդային Միությո՞ւնն է նրանց վատ բաներ սովորեցրել, թե՞ հակառակը»,- ասել է Սիմոնյանը։
Նա նշել է, որ մեդիաընկերության աշխատակիցների ներքին զրույցները հաճախ հայտնվում են RT-ի մրցակիցների տնօրինության տակ, իսկ դա չի կարող տեղի ունենալ առանց հատուկ ծառայությունների մասնակցության։
«Ինչպե՞ս կարող է մեր մասնավոր զրույցը, որը երբեք ոչ մի տեղ չի հրապարակվել, հայտնվել արևմտյան լրատվամիջոցում, որը հայտնի է հատուկ ծառայությունների հետ ունեցած համագործակցությամբ»,- ասել է Սիմոնյանը։
Նա ընդգծել է, որ երբ խոսում է հեռախոսով կամ որևէ բան գրում, հաշվի է առնում այն հանգամանքը, որ ինքն ու զրուցակիցը մենակ չեն։
«Ես գիտեմ, որ մենք ոչ թե երկուսով ենք, ոչ թե երեքով, այլ գուցե նույնիսկ հինգով»,- ասել է նա։
