ԵՐԵՎԱՆ, 24 մարտի — Sputnik. ՀՀ նախագահ Սերժ Սարգսյանը հարցազրույց է տվել «Միր» («Мир») հեռուստաալիքին։ Նախագահն իր խոսքում անդրադարձել է նաև լոնդոնյան ահաբեկչությանն ու խոսել այդ չարիքի մասին, ընդհանրապես։
«Ահաբեկչությունն այնպիսի չարիք է, որը կարող է հայտնվել ցանկացած վայրում: Այդ պատճառով միշտ պետք է զգոն լինել: Պետք է անընդհատ միջոցներ ձեռնարկել: Ես հիանալի հասկանում եմ, որ և՛ Լոնդոնում, և՛ Փարիզում շատ միջոցներ են ծախսվում անվտանգության համար, բայց ահաբեկչությունն իրականում հանցագործություն է, որն անհնար է կանխատեսել: Մի բան է, երբ կա տեսանելի թշնամի:
Մեկ այլ բան, երբ փախստականների անվան տակ Եվրոպա կարող են ներթափանցել մարդիկ, որոնք բոլորովին այլ խնդիր ունեն: Դրա դեմ շատ դժվար է պայքարել»,- նշել է ՀՀ նախագահը:
Հիշեցնենք, որ մարտի 22-ին Լոնդոնում՝ խորհրդարանի շենքի մոտ տեղի ունեցած ահաբեկչության հետևանքով զոհվել է 4 մարդ, այդ թվում նաև` ահաբեկիչը։ Տասնյակ անձինք վիրավորվել են: Ահաբեկչության պատասխանատվությունը ստանձնել է «Իսլամական պետություն» ահաբեկչական խմբավորումը:
