ԵՐԵՎԱՆ, 27 մարտի — Sputnik. Հայ ֆուտբոլիստ Գևորգ Ղազարյանը մոտակա ամիսներին դժվար թե կարողանա վերադառնալ խաղադաշտ, քանի որ մարտի 26-ին կայացած Հայաստան-Ղազախստան հանդիպման ընթացքում ստացած վնասվածքը բավական լուրջ է: Հայ ֆուտբոլիստին ամենայն հավանականությամբ կվիրահատեն: Այդ նպատակով Գևորգ Ղազարյանն արդեն այսօր մեկնելու է Գերմանիա:
Նախօրեին կայացած հանդիպման երկրորդ րոպեին Ղազախստանի հավաքականի դարպասապահ Դավիթ Լորիայի հետ պայքարում Գևորգ Ղազարյանը հայտնվեց կանաչ խոտածածկին ու խաղադաշտից հեռացավ միայն պատգարակի օգնությամբ:
Հիվանդանոցում պարզվեց, որ հայ ֆուտբոլիստը շատ լուրջ վնասվածք է ստացել: Ախտորոշումը ցույց տվեց, որ Ղազարյանի մոտ կա ծնկի խաչաձև կապանների պատռվածք և մենիսկի վնասվածք:
Ֆուտբոլային պրակտիկան ցույց է տալիս, որ նման վնասվածքները ապաքինվում են վիրաբուժական միջամտությամբ: Պարզ է, որ վիրահատությունից հետո էլ բավական երկար ժամանակ կպահանջվի վերականգնվելու համար: Համենայնդեպս առաջիկա չորս ամիսներին Ղազարյանը խաղալու հնարավորություն չի ունենա: Առողջություն մեր ֆուտբոլիստին:
