ԵՐԵՎԱՆ, 3 ապրիլի — Sputnik. Հայաստանում խորհրդարանական ընտրություններն, ԱՊՀ դիտորդների գնահատմամբ, անցան հանգիստ և կազմակերպված։ Վերահսկման մեխանիզմների կատարելագործման համար կիրառված տեխնիկական նորամուծություններն արդարացրին իրենց։ Այս մասին լրագրողների հետ հանդիպման ժամանակ ասաց ԱՊՀ դիտորդների առաքելության ղեկավար, Գործադիր կոմիտեի նախագահ, ԱՊՀ գործադիր քարտուղար Սերգեյ Լեբեդևը։
Նրա խոսքով` ներկա պահին կոմիտեն ամփոփում է նախնական արդյունքները, վերջնականը կլինի վերջնական արդյուքների հրապարակումից հետո։
«Դիտորդների հետ փոխանակվեցինք կարծիքներով և ուզում ենք ասել` Հայաստանում ընտրությունները թափանցիկության առումով նույնիսկ գերազանցեցին որոշ արևմտյան երկրներին, որոնք փորձում են մեզ սովորեցնել` ինչպես անցկացնել ընտրություններ»,–ասել է Լեբեդևը։
Հայաստանի այս փորձը կուսումնասիրվի ԱՊՀ երկրների ներկայացուցիչների կողմից և, հավանաբար, կընդօրինակվի այլ պետություններ կողմից։
«Ընտրություններին հետևեցինք Հայաստանի գրեթե բոլոր մարզերում։ Չեմ կարող չնշել այն նորամուծությունները, որոնք առկա են Հայաստանի ԸՕ-ում։ Տեխնիկական միջոցների կիրառմամբ նման նորարարություններ չկա դեռ ԱՊՀ և ոչ մի երկրում», — ասել է առաքելության ղեկավարը։
Միակ դժվարությունը, որոնց բախվեցին ընտրողները, կապված էր մատնահետքեր վերցնող սարքերի հետ։ Հիմնականում բարդ էր մեծահասակների համար, որոնց չէր հաջողվում առաջին փորձից գրանցել։ ԱՊՀ դիտորդների գնահատականներով` նախօրեին անցկացրած խորհրդարանական ընտրությունների ընթացքում հաջողվեց խուսափել կուտակումներից։
Ընտրություններն, ըստ նրանց գնահատականների, անցան հանգիստ, կազմակերպված։ Նոր ընտրական օրենսդրությամբ կիրառված նորամուծությունները նպաստեցին քվեարկության գործընթացի կատարելագործմանը։
Ընդհանուր առմամբ, ընտրություններն անցան հանգիստ, բազմակուսակցական և մրցակցային մթնոլորտում։
Հիշեցնենք, որ Սահմանադրութական փոփոխություններից հետո, նախօրեին` ապրիլի 2-ին, առաջին անգամ Հայաստանում անցկացվեցին ԱԺ ընտրություններ։ Հայաստանը փաստացի անցում կատարեց կառավարման խորհրդարանական համակարգին։ Ընտրություններին ընտրողների մասնակցությունը կազմեց 60,93%։ Հայաստանում խորհրդարանական ընտրության ընթացքին հետևում էր 172 դիտորդ ԱՊՀ ութ երկրներից` Ուզբեկստանից, Ղազախստանից, Ռուսաստանից, Բելառուսից, Ղրղըզստանից, Մոլդովայից, Թուրքմենստանից և Տաջիկստանից։ Առաքելության կազմում էին ԱՊՀ միջխորհրդարանական վեհաժողովի, Ռուսաստանի և Բելառուսի ԱԺ, ԱՊՀ գործադիր կոմիտեի ներկայացուցիչները։
