«Հայաստանի հանրապետություն». Քուվեյթի գործարարը հետաքրքրված է «Հյուսիս-հարավի» կառուցմամբ
«Հայաստանի Հանրապետություն» թերթը գրում է. Քուվեյթի ներդրող Չարլզ Հեյդերը հետաքրքրված է Հայաստանում շինարարության, մասնավորապես, ճանապարհաշինության ոլորտով:
Տնտեսական զարգացման և ներդրումների նախարար Սուրեն Կարայանը Չարլզ Հեյդերի հետ հանդիպմանը քննարկել է «Հյուսիս-հարավ» ճանապարհի կառուցման ոլորտում անհրաժեշտ ներդրումները, իրականացման հնարավոր տարբերակները և առաջարկել համագործակցության հեռանկարները քննարկել նաև ՀՀ տրանսպորտի, կապի և տեղեկատվական տեխնոլոգիաների նախարարի հետ:
«Ժողովուրդ». Կրկին ժամանակավոր կառավարություն. Սերժ Սարգսյանը բացել է փակագծերը
«Ժողովուրդ» թերթը գրում է. «ՀՀԿ-ում սպասողական իրավիճակը դեռ երկար է շարունակվելու: Բանն այն է, որ առաջիկայում ձեւավորվելիք կառավարությունը էլի ժամանակավոր է լինելու, և նշանակվելիք նախարարները պաշտոնավարելու են ընդամենը մեկ տարի: Իսկ դա նշանակում է, որ ՀՀԿ ներսում մեկ տարի անց պաշտոնների համար կրկին մրցավազք է սկսվելու:
Ինչպես պնդում են «Ժողովուրդ»-ի աղբյուրները՝ Սերժ Սարգսյանն իր մտերմիկ շրջապատում հայտարարել է, որ առաջիկայում ձեւավորվելիք կառավարությունը կպաշտոնավարի մինչեւ հաջորդ տարվա ապրիլ, երբ լրանան նախագահական իր լիազորությունները, ուժի մեջ մտնի նոր Սահմանադրությունն ու երկիրը վերջնական անցում կկատարի խորհրդարանական կառավարման համակարգի:
Միայն դրանից հետո կձեւավորվի հիմնական կառավարությունը` քաղաքական նոր կառավարման համակարգի տրամաբանությանը համապատասխան: Այս փաստը, բնականաբար, ՀՀԿ-ականների մի մասն ուրախությամբ է ընդունել, քանի որ հույս ունի մեկ տարվա ընթացքում այնպես անել, որ պաշտոն ստանա, իսկ ոմանք էլ տխրել են, քանի որ կասկածում են կրկին կառավարության կազմում լինելու հեռանկարին:
«Հրապարակ». «ՍԱՍ»-ի սկանդալային ժողովի նոր նրբերանգները
«Հրապարակ» թերթը գրում է. ««ՍԱՍ»-ի աղմկահարույց ժողովի ձայնագրությունը հիմք հանդիսացավ, որ իրավապահները քրգործ հարուցեն ընտրողներին դրամ և այլ առավելություններ խոստանալու առթիվ։ Սակայն այստեղ կա մեկ այլ խնդիր էլ։
Ձայնագրությունը վկայում է, թե ինչպես է տնտեսվարողը ոտնահարում աշխատողների իրավունքները, ինչին պետք է արձագանքեր Աշխատանքի տեսչությունը, որն այժմ գործում է Առողջապահության տեսչության կազմում։
«Ժամանակ». Գագիկ Խաչատրյանը կվերադառնա՞ գործադիր բարձր պաշտոնի
«Ժամանակ» թերթը գրում է. «Վերջերս հայտնի է դարձել, որ ՊԵԿ նախկին նախագահ Գագիկ Խաչատրյանին պատկանող Ucom-ը և Սամվել Կարապետյանին պատկանող «Տաշիր» ընկերությունների մաս կազմող «Ֆորա-Բանկը» գործակցության համաձայնագիր են ստորագրել, որը թույլ կտա Ucom-ին ընդլայնվել Ռուսաստանի տարածքում։
Մեզ հայտնի է դարձել, որ այս գործարքի շնորհիվ Գագիկ Խաչատրյանը, հնարավոր է, կրկին վերադառնա գործադիր՝ բարձր պաշտոնի։ Այսպիսի հեռանկարի համար խիստ նպաստավոր դերակատարում կարող է ունենալ Սամվել Կարապետյանը, որը սերտ և ուղիղ առնչություն ունի վարչապետ Կարեն Կարապետյանի նշանակումների և մտադրությունների հետ»։
