ԵՐԵՎԱՆ, 4 մայիսի — Sputnik. Հայ ըմբիշները հաղթանակով սկսեցին իրենց ելույթները: Ֆռանգուլյանն առաջին գոտեմարտում առավելության հասավ սլովակ Միկոլա Բոլոտնյուկի նկտամամբ, իսկ Գրիգորյանը իրար հետևից երկու հաղթանակ տոնեց նախ՝ ավստրիացի Ամիրխան Վիսալիմիովի, ապա լեհ Անջեյ Սոկալսկիի նկատմամբ:
Քառորդ եզրափակիչում շատ համառ պայքար ստացվեց Գրիգոր Գրիգորյանի ու վրացի Ավթանդիլ Քենթչաձեյի միջև: Հաջողությունը ուղեկցեց մեր ըմբիշին ու հաղթելով 5:4 հաշվով՝ Գրիգորյանը դուրս եկավ կիսաեզրափակիչ: Իր հերթին հաղթանակի հասավ նաև Վոլոդյա Ֆռանգուլյանը, որի գրոհների դեմ ոչինչ չկարողացավ անել բուլղարացի Դիմիտար Լյուբոմիրով Իվանովը:
Կիսաեզրափակչում հաղթանակը մեր տղաներին առնվազն ապահովում էր Եվրոպայի առաջնության արծաթե մեդալը: Առաջինը մեր ըմբիշներից գորգ դուրս եկավ Վոլոդյա Ֆռանգուլյանը: Ցավոք, եզրափակիչ դուրս գալ չհաջողվեց: Ֆռանգուլյանը 1:11 հաշվով պարտվեց ռուսաստանցի Ախմետ Չակաևին:
Գրիգոր Գրիգորյանի մրցակիցը Ռիոյի օլիմպիական խաղերի բրոնզե մեդալակիր և Եվրոպայի գործող չեմպիոն՝ թուրք Սոներ Դեմիրթաշն էր: Գրիգորյանը արժանի մրցակից էր ու մինչև վերջ պայքար մղեց հաղթանակի համար, բայց պարտվեց 6:8 հաշվով: Այդպիսով, մեր երկու ըմբիշներն էլ երեկոյան մրցահերթում կպայքարեն բրոնզե մեդալի համար:
Վաղն արդեն պայքարի մեջ կմտնեն վերջին երկու քաշային կարգերի ըմբիշները: Հայաստանը 70 կգ քաշային կարգում ներկայացնելու է Վալտեր Մարգարյանը և գերծանր քաշային կարգում հանդես կգա Լևան Բերիանիձեն:
