ԵՐԵՎԱՆ, 15 մայիսի — Sputnik. Մայրերի միջազգային օրվա՝ մայիսի 14-ի առթիվ «Facebook» սոցիալական ցանցի օգտատերերը կարող էին արձագանքել գրառումներին «Երախտապարտ եմ» սիմվոլիկ նշանակությամբ մանուշակագույն ծաղկի միջոցով, որը թուրքական շրջանակներում նույնացվել է Հայոց ցեղասպանության 100-րդ տարելիցի խորհրդանիշը դարձած անմոռուկի հետ: Այս մասին գրում է ermenihaber.am-ը։
«Facebook»-ը ձեզ խաբել է», «Facebook-ի Երախտագիտության ծաղիկը Հայոց ցեղասպանության խորհրդանի՞շն է», «Ի՞նչ է թաքնված Facebook-ի Երախտագիտության նշանի հետևում», «Facebook-ի հայկական խաղը՝ ընդդեմ թուրքերի», «Արդյո՞ք մենք երախտապարտ ենք Facebook-ին» և նմանատիպ վերնագրերով բազմաթիվ հոդվածներ են հայտնվել թուրքական լրատվակայքերում՝ միաբերան պնդելով, որ այս քայլով հռչակավոր համաշխարհային ցանցը ակնհայտ աջակցություն է ցուցաբերել հայերին և Հայոց ցեղասպանության հիշատակին:
Թուրքական մեդիան պնդում է, որ «Facebook»-ը չէր կարող Մայրերի տոնի համար պատահաբար ընտրած լինել հենց այդ խորհրդանիշը, քանի որ Հայոց ցեղասպանության 100-րդ տարելիցի հիշատակի միջոցառումների ընթացքում անմոռուկը չափազանց լայնորեն պրոպագանդել էր և գրեթե ողջ աշխարհում արդեն կապվում, նույնացվում է Ցեղասպանության հետ:
Թուրքական աղբյուրները հիշեցնում են, որ անմոռուկը ընտրվել էր որպես Հայոց ցեղասպանության հիշատակի խորհրդանիշ, քանի որ աշխարհի գրեթե բոլոր երկրներում այն ասոցացվում է «չմոռանալու», «հիշելու» գաղափարի հետ:
