ԵՐԵՎԱՆ, 26 մայիսի — Sputnik. «Ավրորա» միջազգային մարդասիրական մրցանակի կազմակերպիչները 66 երկրից մարդկանց անձնուրաց գործունեության մասին պատմող 254 պատմություն են ստացել, Հայաստանի ամերիկյան համալսարանում ասաց մրցանակի համահիմնադիր Ռուբեն Վարդանյանը։
«Դրանք այն խիզախ մարդիկ են, որոնք իրենց կյանքը վտանգում են մյուսներին փրկելու համար։ Սա անհավանական մի ցուցակ է մարդկանց, որոնք ապացուցել են իրենց բացառիկությունը»,- ասաց Վարդանյանը։
Ներկայացված է ընդամենը մի քանի պատմություն, սակայն բոլորը պատմում են տարբեր երկրներում ամեն օր իրենց կյանքը վտանգող մարդկանց մասին։
Վարդանյանը նշեց, որ առաջին մրցանակաբաշխության ժամանակ 115 պատմություն էին ստացել 18 երկրից, որոնց միայն 20% կրկնվեց այս տարի։
«Ավրորա» մարդասիրական նախաձեռնությունը, որը ստեղծվել է Հայոց ցեղասպանության ականատեսների անունից՝ ի երախտագիտություն նրանց փրկողների, ձգտում է հնարավորություն տալ մերօրյա հերոսներին՝ կյանք և հույս պարգևել մարդասիրական աջակցության խիստ կարիք ունեցողներին, այդպիսով, շարունակել մարդասիրության շղթան աշխարհով մեկ:
«Ավրորա» մարդասիրական նախաձեռնությունը գործով արտահայտված երախտագիտություն է: Այն նպատակ ունի ութ տարի շարունակ (2015-2023թթ.՝ ի հիշատակ ութ տարի տևած Հայոց ցեղասպանության՝1915-1923 թթ.) աջակցել մարդկանց, որոնք, վտանգելով իրենց կյանքը, կնպաստեն այնպիսի նախագծերի իրագործմանը, որոնք կբարելավեն առավել կարիքավոր և աղքատ մարդկանց կենցաղը:
