ԵՐԵՎԱՆ, 17 հունիսի — Sputnik, Լաուրա Սարգսյան. «Armenia» ավիաընկերության ինքնաթիռները Երևանից Սալոնիկ են մեկնելու հունիսի 22-ից սկսած՝ ամեն հինգշաբթի: Դեպի Հունաստան կանոնավոր չվերթերը կգործեն ամառային սեզոնի ամբողջ ընթացքում:
«Զվարթնոց» միջազգային օդանավակայանից ինքնաթիռները կմեկնեն չվացուցակի համաձայն` ժամը 18:00-ին:
«Ավիատոմսերի արժեքը կլինի՝ սկսած 189 եվրոյից: Արժեքը ներառում է ուղեբեռը, ձեռքի բեռը և սնունդ օդանավում»,- Sputnik Արմենիայի թղթակցի հետ զրույցում ասաց «Armenia» ավիաընկերության տնօրենի տեղակալ Գևորգ Խաչատրյանը:
Նրա խոսքով` ավիաընկերությունը մոտ ապագայում ևս մեկ նոր ուղղություն կներկայացնի: Հուլիսին այն մտադիր է գործարկել չարտերային չվերթ դեպի Իսպանիա (Բարսելոնա) և Իրաք:
«Armenia»-ն ներկա փուլում չվերթեր է իրականացնում նաև դեպի Վորոնեժ, Մինվոդի, Թել Ավիվ, ինչպես նաև չարտերային չվերթեր ունի:
«Armenia» ավիաընկերությունն ունի երկու ինքնաթիռ` Boeing 737-500 և Boeing 737-700։ Անձնակազմում կա 53 աշխատակից։ Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս):
Հայաստանն ազգային ավիափոխադրողից զրկվել է 2013 թվականին` «Արմավիա» ընկերության սնանկացումից հետո: Այնուհետև ավիաշուկայում հայտնվել է AirArmenia ավիաընկերությունը, որն էլ 2014 թվականի հոկտեմբերին, հայտնվելով սնանկացման եզրին, դադարեցրել է թռիչքները։
Այժմ հայկական շուկայում երկու հայկական ավիափոխադրող է գորում` «Armenia» և «Տարոն Ավիա»:
