«Հայկական ժամանակ». Մինասյանը պաշտոնանկ կարվի՞
«Հայկական ժամանակ» թերթը գրում է. «Խոսրովի արգելոցի տարածքում և Վայոց ձորի մարզում բռնկված հրդեհները, բացի բնապահպանական հետևանքներից, քաղաքական հետևանքներ նույնպես կունենան:
Երեկ արդեն մինի «պատերազմ» սկսվեց ԱԻ և բնապահպանության նախարարությունների միջև: Բանն այն է, որ երեկվա հոդվածում մեջբերել էինք օգոստոսի 8-ի ԱԻ նախարարության տարածած հաղորդագրությունից մի հատված, որով նախարարությունը խորհուրդ էր տվել «Առավել հրդեհավտանգ ժամանակահատվածներում ճանապարհներին (անտառի մուտքի մոտ) ստեղծել հսկիչ կետեր»: Նաև հարց էինք բարձրացրել, թե ում էր ուղղված այդ խորհուրդը, այսինքն՝ որն էր պարտականություններում թերացած գերատեսչությունը:
Այսօր ԱԻՆ-ը, արձագանքելով հրապարակմանը, տվեց այդ հարցի պատասխանը: Մեջբերելով «Հրդեհային անվտանգության մասին» օրենքի, ՀՀ Անտառային օրենսգրքի համապատասխան հոդվածները, ԱԻՆ-ը սլաքներն ուղղեց դեպի բնապահպանության նախարարություն:
Ի սկզբանե Կարեն Կարապետյանն, ըստ մամուլի հրապարակումների, փորձում էր դաշնակցական նախարարներին, ավելի կոնկրետ՝ բնապահպանության նախարար Արծվիկ Մինասյանին և կրթության և գիտություն նախարար Լևոն Մկրտչյանին փոխարինել ավելի երիտասարդ կադրերով:
Սերժ Սարգսյանի և Կարեն Կարապետյանի հակասությունների արդյունքում վարչապետը այդպես էլ չկարողացավ իր մտադրությունը կյանքի կոչել: Հիմա, իհարկե, դժվար է ասել, եթե Բնապահպանության նախարարը ժամանակին փոխվեր, արդյոք նոր նախարարն ավելի պատասխանատո՞ւ կգտնվեր, և վերջին կործանարար հրդեհներից հնարավո՞ր կլիներ խուսափել: Բայց որ Արծվիկ Մինասյանը ձախողել է, ակնհայտ է:
Մինասյանի ձախողումը կարող է նաև նորից բորբոքել նրան փոխելու՝ Կարեն Կարապետյանի ցանկությունը: Այս անգամ վարչապետը շատ ավելի լուրջ հիմքեր ունի դրա համար:
Դատելով, սակայն, այսօր նախագահական նստավայրում անցկացված խոհրդակցության կադրերից, որտեղ Սերժ Սարգսյանը բավական փաղաքշական տոնով է դիմում Բնապահպանության նախարարին, կարելի է կանխատեսել, որ առաջիկայում նույնպես Արծվիկ Մինասյանը կվայելի Սերժ Սարգսյանի լիակատար հովանավորությունը»:
«Հրապարակ». Վարչապետը ծնունդը նշեց Մոսկվայում
Պաշտոնական այցով Ղազախստան՝ Աստանա մեկնած վարչապետ Կարեն Կարապետյանը Եվրասիական միջկառավարական խորհրդի նիստին մասնակցելուց անմիջապես հետո մեկնել է Մոսկվա՝ ծննդյան 54-ամյակը նշելու:
Աշխարհի տարբեր ծայրերից այստեղ են ժամանել նրա ընկերներն ու մտերիմները: Մասնավորապես՝ ծննդյան արարողությանը ներկա է գտնվել Սամվել Կարապետյանը, ով մինչ այդ ուղեկցում էր Սերժ Սարգսյանին և Գագիկ Ծառուկյանին՝ եվրոպական ուղևորությունների ժամանակ: Մոսկվա է ժամանել նաև ՊԵԿ նախագահ Վարդան Հարությունյանը, ով, մեր տեղեկություններով, հանգստանում էր Հունաստանում:
«Առավոտ». Իսրայելի և Չինաստանի ակտիվացումը հեռանկարներ է բացում Հայաստանի համար
«Միջազգային հարթակում տեղի ունեցող գործընթացները և համակարգային տեղաշարժերը հերթական անգամ վեր են հանում և ընդգծում միջազգային քաղաքական և տնտեսական, ինչպես նաև անվտանգության տեսանկյունից Հայաստանի շահեկան դիրքը և մեծ աշխարհաքաղաքական հնարավորություններն ու հեռանկարները: Իսրայելի և, մասնավորապես, ծայրահեղ հաշվենկատ և պրագմատիկ Չինաստանի նման պետությունների շահագրգռվածությունը խորացնել համագործակցությունը Հայաստանի հետ, դրա վառ ապացույցներից են:
Ավելին, այս սկզբունքորեն իրարից տարբերվող պետությունների ակտիվացումը Հայաստանում կարելի է գնահատել նաև որպես տեսանելի ապագայում Հայաստանում Ռուսաստանի դիրքերի թուլացման ազդակ, ինչը նույնպես որոշակի հեռանկարներ է բացում Հայաստանի համար», — «Առավոտին» տված հարցազրույցում նշել է ՀՀ ԱԳՆ ՆԱՏՕ-ի բաժնի նախկին վարիչ, ժողովրդավարության, անվտանգության և զարգացման հայկական կենտրոնի փորձագետ Մարթա Այվազյանն՝ անդրադառնալով ՀՀ արտաքին քաղաքականությանը վերաբերող որոշ իրադարձություններին:
