ԵՐԵՎԱՆ, 26 օգոստոսի — Sputnik. Անգլիայի Պրեմիեր լիգայի 3-րդ տուրում «Մանչեսթեր Յունայթեդը» «Օլդ Թրաֆորդում» ուժերը կչափի «Լեսթերի» հետ:
«Կարմիր սատանաների» գլխավոր մարզիչ Ժոզե Մոուրինյուն նախախաղային մամուլի ասուլիսի ժամանակ խոսել է նաև թիմի հայ կիսապաշտպան Հենրիխ Մխիթարյանի մասին: Այս մասին տեղեկացնում է armsport.am-ը:
«Կարծում եմ` Հենրիխն ինձ հասկանում է, և, եթե անկեղծ լինենք, ես նրան նույնպես հասկանում եմ: Եթե նա մրցաշրջանի սկզբում ինձ ավելի ճիշտ հասկանար, ապա ավելի շատ կհայտնվեր խաղադաշտում:
Միաժամանակ, եթե ես Հենրիխին ավելի լավ հասկանայի, ապա կարող էի նրան ավելի շուտ օգնել: Երկար ժամանակ պահանջվեց միմյանց ճանաչելու համար:
Մխիթարյանը նախորդ մրցաշրջանի երկրորդ հատվածն ավելի լավ անցկացրեց, և ես վստահ եմ, որ իր տաղանդով նա ընթացիկ մրցաշրջանում ավելի լավ հանդես կգա»,- պորտուգալացի մասնագետի խոսքն է մեջբերում «Մանչեսթեր Յունայթեդի» պաշտոնական կայքը:
Հիշեցնենք, որ մրցող թիմերի միջև հանդիպումը կկայանա այսօր` օգոստոսի 26-ին, Երևանի ժամանակով 20:30-ին:
