ԵՐԵՎԱՆ, 1 սեպտեմբեր — Sputnik. ՀՀ ԱԻՆ Երևան քաղաքի փրկարար ծառայության տնօրենի տեղակալ Առլեն Բադալյանը լրագրողների հետ զրույցում ասաց, որ Տրանսպորտի, կապի և տեղեկատվական տեխնոլոգիաների նախարարությունում տեղադրված ռումբի մասին ահազանգը կեղծ էր։
«Կինոլոգների կողմից ստուգվել է ամբողջ շինությունը, և ոչինչ չի հայտնաբերվել։ Աշխատակիցները կարող են վերադառնալ իրենց աշխատասենյակներ»,–ասաց Առլեն Բադալյանը։
Փրկարար ծառայության տնօրենի տեղակալի խոսքով` շենքի ստուգման աշխատանքները տևել են մոտ 2 ժամ։
Հիշեցնենք, որ սեպտեմբերի 1-ին, ժամը 10:26-ին ոստիկանությունից տեղեկություն է ստացվել, որ Երևան քաղաքի Նալբանդյան փողոցի թիվ 28 հասցեում գտնվող Տրանսպորտի, կապի և տեղեկատվական տեխնոլոգիաների նախարարությունում պայթուցիկ սարք է տեղադրված. անհրաժեշտ է փրկարարների օգնությունը:
Դեպքի վայր են մեկնել մեկ մարտական հաշվարկ, Ճգնաժամային կառավարման ազգային կենտրոնի արտակարգ իրավիճակների արձագանքման խումբը, Հատուկ նշանակության փրկարարական աշխատանքներ իրականացնող կենտրոնի փրկարարական ջոկատը և սակրավորների խումբը:
Մինչ փրկարարների՝ կանչի վայր հասնելն իրականացվել է բնակչության տարհանման աշխատանքներ: Փրկարարները սահմանազատել են տարածքը:
